ప్రకాశం జిల్లా:  మన రాష్ట్రానికి కాబోయే ముఖ్యమంత్రి నారా లోకేష్ బాబు అని కనిగిరి ఎమ్మెల్యే డాక్టర్ ముక్కు ఉగ్ర నరసింహ రెడ్డి అన్నారు. నియోజకవర్గం లోని పీసీ పల్లి మండలం దివాకరపల్లి ప్రాంతం లో సిబిజి ప్లాంట్ కు భూమి పూజ చేసేందుకు రాష్ట్ర మంత్రి నారా లోకేష్ వచ్చారు. ఈ సందర్భంగా ఏర్పాటు చేసిన సభకు అశేష జనం తరలివచ్చారు.  ఈ సభలో ఎమ్మెల్యే ఉగ్ర మాట్లాడుతూ పై వ్యాఖ్యలు చేశారు. కనిగిరి కి ఈ ప్రాజెక్టు ను అడగగానే తీసుకు వచ్చారని, అందుకే తను కాబోయే ముఖ్యమంత్రి నారా లోకేష్ అని సంబోధించినట్లు ఆయన అన్నారు. ఈ సందర్భంగా మంత్రి నారా లోకేష్ , కార్యక్రమ ఆధ్యంతం శాసనసభ్యుని ప్రశంసలతో అభినందించారు. ఈ మారుమూల ప్రాంతంలో ఇంకా ఎన్నెన్నో కంపెనీలు వస్తాయని, ఈ ప్రాంతపు నిరుద్యోగ యువతీ యువకులకు ఉద్యోగాలు దొరుకుతాయని వలసలు అరికట్టవచ్చని ఈ ప్రాంతం కూడా సస్యశ్యామలవుతుందని ఆయన అన్నారు. త్వరలో ట్రిపుల్ ఐటీ కి శంకుస్థాపన కూడా చేస్తామన్నారు. ఎమ్మెల్యే డాక్టర్ ఉగ్ర నరసింహ రెడ్డికి   ప్రభుత్వం అన్ని విధాల  అండగా ఉంటుందని లోకేష్ బాబు భరోసా ఇచ్చారు.

ప్రకాశం జిల్లా:  దోర్నాల కు  చెందిన ధీరజ్ శ్రీకృష్ణ ఫౌండేషన్ పేద ప్రజలకు పలు సేవా కార్యక్రమాలు నిర్వహిస్తూ గుర్తింపు పొందింది. ఇటీవల ఈ సంస్థ నిర్వాహకులు గుమ్మ పద్మజ యల్లేష్ యాదవ్ ని, మెగా హెల్పింగ్ ఫౌండేషన్ చైర్మన్ పి శిరీష రెడ్డి, బంగారు నంది అవార్డు అందచేసి ఘనంగా సత్కరించారు. ఈ  సందర్భంగా విశ్రాంత ప్రధానోపాధ్యాయులు జంకె ఆవుల రెడ్డి, సోమవారం తన స్వగృహంలో అవార్డు గ్రహీత పద్మజ యల్లేష్ యాదవ్ ని ఘనంగా  సత్కరించారు. అనంతరం ఆయన మాట్లాడుతూ..మార్కాపురం, జిల్లా పరిషత్ ఉన్నత పాఠశాల విద్యార్థి 2003 - 2004 సంవత్సరం 10వ తరగతి పూర్తి చేసుకున్న గుమ్మా యల్లేష్ పెద్ద దోర్నాల ఎంపీపీగా 2019 ఎన్నికల్లో గెలిచి అనేక సేవా కార్యక్రమాలు నిర్వహిస్తూ మంచి విద్యార్థిగా పేరు పొందారని గుర్తు చేశారు. గుమ్మా యల్లేష్ యాదవ్  నా స్టూడెంట్ కావడం చాలా ఆనందంగా ఉందని ఇలాంటి పదవులు, అవార్డులు మరెన్నో పొందాలని ఆకాంక్షించారు. ఈ కార్యక్రమంలో ఒంటేరు వెంకట రమణయ్య, మహేష్ రెడ్డి, సుబ్బారెడ్డి, బోరి గొర్ల రాజులు, లక్ష్మీనారాయణ రెడ్డి,లు పాల్గొన్నారు.

మార్కాపురం: ఉగాది పండుగను పురస్కరించుకుని మందిరం నందు పలు సేవా కార్యక్రమములు నిర్వహించారు.  ఉదయం మందిరం నందు సామూహికముగా  ప్రత్యేక పూజలు, బీదలకు ధర్మ కుంభ దానము, చ్ఛత్ర దానము, పాదరక్షలు, వస్త్ర అలాగే బీదలకు అన్నదానం( 250 మందికి) మొదలైన కార్యక్రమములు జరిగినవి. అంతే కాకుండ ప్రతి సంవత్సరం మందిర సేవా కార్యక్రమములలో భాగముగా ఆర్టీసీ బస్టాండ్ ఆవరణలో చలివేంద్రం ను ఆర్టీసీ డిఎం నర్సింహులు ప్రాంభించారు.  ఈ కార్యక్రమాలలో మందిర సభ్యులు పాల్గొన్నారు.  ఇలాంటి సేవా కార్యక్రమములో పాల్గొని బీదలకు సేవ చేయడమే శ్రీ శిరిడి సాయి బాబా ఆచరించి చూపారని ఆలయ ప్రతినిధులు తెలిపారు.

మార్కాపురం :  భానుడు  భగభగమంటున్నాడు.. ఎంతోమంది ప్రజలు పట్టణానికి వివిధ పనులపై వస్తూ ఉంటారు దాహం తీర్చుకునేందుకు ఇబ్బందులు పడుతున్నారు. పేద ప్రజల దాహం తెచ్చేందుకు మార్కాపురం పట్టణంలోని  హెడ్ పోస్ట్ ఆఫీస్ దగ్గర హిందూ చైతన్య వేదిక ఆధ్వర్యంలో ఆదివారం  చలివేంద్రం ప్రారంభించారు. ఈ ప్రారంభోత్సవ కార్యక్రమానికి స్టేట్ అధ్యక్షులు తానుగుండాల వెంకటేశ్వర రెడ్డి, జిల్లా అధ్యక్షులు వాసు, సుబ్బు శ్రీధర్, నగర ఉపాధ్యక్షుడు లక్ష్మీనారాయణ, లక్ష్మణ్, గౌరవ అధ్యక్షులు రంగస్వామి గౌడ్ తదితరులు పాల్గొన్నారు.

ఎర్రగొండపాలెం:  తెలుగుదేశం పార్టీ ఇన్చార్జి గూడూరి ఎరిక్షన్ బాబు కుట్ర రాజకీయాలు చేస్తూ ప్రజల మధ్య వైషమ్యాలు పెంచుతూ  అందులో చలికాచుకుంటూ నియోజకవర్గం ను బ్రష్టు పట్టిస్తున్నారని వైఎస్ఆర్సిపి రాష్ట్ర అధికార ప్రతినిధి, ఎర్రగొండపాలెం శాసనసభ్యులు తాటిపర్తి చంద్రశేఖర్ అన్నారు. రెండు రోజుల క్రితం జరిగిన ఎంపీపీ ఎన్నికలలో వైఎస్ఆర్సిపి పార్టీకి చెందిన వారిని మోసగించి, బెదిరింపులకు గురి చేస్తూ వారిని భయభ్రాంతులకు గురి చేయడమే కాక ఐదు మందిని గృహనిర్బంధం చేసిన విషయాన్ని  వారి ద్వారానే విలేకరులకు తెలియజేశారు. అధికారం ఉంది కదా అని పోలీసులను పావులుగా వాడుకుంటూ వారి తోనే ఇటువంటి కుట్ర రాజకీయాలు చేయటం నిజంగా నాయకుడు అనేవాడు చేసే పనేనా అంటూ ఆయన విమర్శించారు. ఐదు మందిని ఎస్సీ, ఎస్టీ బీసీలకు చెందిన వారి ని ఎంపీటీసీలను అక్రమంగా గృహనిర్బంధం చేయడమే కాక తమ పార్టీ కండువాలు కప్పుకుని తాము సూచించిన వారికే చేతులెత్తాలని బెదిరింపులకు గురి చేయటం దీనిని రాజకీయమంటారా అని ఆయన ప్రశ్నించారు. పార్టీకి వెన్నుపోటు పొడిచిన ఏ ఒక్కరిని రాష్ట్ర అధిష్టానం ఆదరించదని అందుకే పార్టీకి వెన్నుపోటు పొడిచిన అభ్యర్థులను పార్టీ నుండి బహిష్కరించినట్లు ఆయన పేర్కొన్నారు. గృహ నిర్బంధం చేసిన ఐదు మందిని బయటి ప్రపంచంతో సంబంధం లేకుండా వారి వద్ద నుండి సెల్ఫోన్లను స్వాధీనం చేసుకొని బయట జరుగుతున్న విషయాలను తెలుసుకోకుండా ఆంక్షలు  పెట్టినట్లు  ఎమ్మెల్యే తెలిపారు. వైయస్సార్సీపి పార్టీల గ్రూపులో ఉండమని మీ పార్టీలో రాజకీయాలు ఉండబట్టే గ్రూపులు ఏర్పడిన విషయాన్ని గుర్తు చేసుకోవాలన్నారు. ప్రతి ఒక్క పనికి రేటు కట్టడమే కాక నమ్ముకున్న నాయకులను, కార్యకర్తలను మోసం చేస్తున్న ఘనత ఇన్చార్జి కి మాత్రమే దక్కిందన్నారు. వైయస్ఆర్సీపీలో ఉన్నది ఒకే గ్రూప్  అది కేవలం జగనన్న గ్రూపు మాత్రమే అన్నారు.. కేవలం ఇంచార్జ్ తమకు బలం లేకున్నా కూడా 18 మంది సభ్యులు తమ వైపు ఉన్న మండల గ్రాంట్ నిధులను కొట్టివేయడానికి ఇటువంటి అరాచక కుట్ర కుతంత్ర రాజకీయానికి   తరలిపినట్లు పేర్కొన్నారు. ఐదు రోజులపాటు తమ పార్టీ ఎంపీటీసీలను ఇబ్బందులకు గురి చేశాడని ఇటువంటి చవకబారు, నీచపు రాజకీయాలు నాయకుడు అనే వాడు ఎవరైనా చేస్తారా అంటూ ఆయన ప్రశ్నించారు. తాను అధికారాన్ని అడ్డుపెట్టుకొని అరాచకాలు చేస్తున్నట్లు తనకు చెందిన గ్రూపులలో రాజకీయాలు చేస్తున్నారని ఇటువంటి పద్ధతులు మానుకుంటే మంచిదంటూ ఆయన సూచించారు. త్రిపురాంతకం ఎంపీపీ ఎన్నికలలో జరిగిన అరాచక కార్యక్రమం రాష్ట్రం యావత్తు తెలిసిపోయిందని కేవలం పోలీసులను అడ్డుపెట్టుకొని మరి ఇటువంటి రాజకీయం చేయడం సమంజసం కాదన్నారు. ఆళ్ల ఆంజనేయ రెడ్డి, ఎస్సీ ఎస్టీలను దూషించారని దాడులకు పాల్పడ్డారంటూ  అక్రమ కేసులు బనాయించారని మరి తమ పార్టీకి చెందిన వారిని అక్రమంగా గృహనిర్బంధం చేసి వారిని బెదిరింపులకు గురి చేస్తే మరి ఎందుకు పోలీసు వర్గాలు చర్యలు తీసుకొనడం లేదని ప్రశ్నించారు. ప్రజలతో ఎన్నుకున్న ఎంపీటీసీల వ్యక్తిగత స్వేచ్ఛను భంగపరచడమే కాక పోలీసులను అదుపులో పెట్టుకుని పోలీస్ వర్గాలతో కుట్ర రాజకీయాలకు తెర లేపటం సీఐ బెదిరింపులకు గురి చేయడం ఇటువంటి రాజకీయాలు రాష్ట్రంలో ఎక్కడా లేవన్నారు. నిర్బంధానికి గురై ఇబ్బందులకు పడిన ఎంపీటీసీలు కేసులు పెడితే వాటిని తీసుకొని సత్తా ఉందా లేదా అంటూ ఆయన ప్రశ్నించారు. పోలీస్ వ్యవస్థ మీద తమకు నమ్మకం ఉందని కానీ కేవలం కొందరు పోలీసులు మాత్రం అడ్డగోలుగా ప్రతిపక్ష పార్టీ మీద కేసులు నమోదు చేయిస్తూ వైఎస్ఆర్సిపి శ్రేణులను ఇబ్బందులకు గురి చేస్తున్నారని ఇటువంటి పద్ధతులు మానుకోవాలని ఆయన సూచించారు. ప్రజలకు భద్రతను కల్పించవలసిన పోలీసులే కేవలం ఇన్చార్జి మాటలను నమ్మి ఒక పార్టీకి కొమ్ము కాయడం సమంజసం అంటూ ఆయన ప్రశ్నించారు. తమ పార్టీకి చెందిన ప్రస్తుతం ఐదు మందితో పాటు సృజనకు కూడా పోలీసుల ద్వారా ఇన్చార్జి ద్వారా ఇబ్బందులు ఉన్నాయని వారికి ఎటువంటి సమస్యలు ఎదురైన అందుకు సమాధానం పోలీసు వర్గాలే సంజాయిషీ ఇవ్వాలన్నారు. ఈ విషయమై రాష్ట్రస్థాయిలో తాము తమ పార్టీ ఆధ్వర్యంలో వినతి పత్రం ఇస్తున్నట్లు పేర్కొన్నారు. అలాగే గత మూడు రోజుల క్రితం మండలంలోని మొగుళ్లపల్లి గ్రామంలో ఒక ఎస్సీ వ్యక్తిపై తీవ్రస్థాయిలో దాడులు జరిగిన కనీసం కేసు నమోదు చేయడానికి పోలీసు వర్గాలు వెనుకంజ వేస్తూ ఇన్చార్జి మాటలను నమ్మి రాజీ పడాలని సూచిస్తున్నారని, ఇటువంటి నీచపు రాజకీయాలు రాష్ట్రంలో ఎక్కడ లేవని ఆయన పేర్కొన్నారు. నియోజకవర్గంలో జరుగుతున్న ఇటువంటి కుట్ర కుతంత్ర రాజకీయాలపై తమపై స్థాయిలో నివేదికను అందజేస్తున్నామని, అలాగే మరో మారు తమ పార్టీ కార్యకర్తలు నాయకుల పై అక్రమ కేసులు బనాయించిన ఇబ్బందులు పడతారని ఆయన హెచ్చరించారు. అనంతరం ఐదు మంది ఎంపీటీసీలు తమకు జరిగిన అన్యాయంపై వివరించారు. కార్యక్రమంలో మండల కన్వీనర్ ఏకుల ముసలారెడ్డి, ఎంపీపీ దొంత కిరణ్ గౌడ్ లతోపాటు స్థానిక నాయకులు కార్యకర్తలు పాల్గొన్నారు.

- పలు రంగాల్లో పదిహేను మంది ప్రముఖులకు విశిష్ట పురస్కారాలు - శ్రీ షిర్డీ సాయిబాబా ఆలయం లో మిన్నంటిన వేడుకలు 

మార్కాపురం : పట్టణ పొలిమేరలో వెలసిన శ్రీ మహాకాళి మహాలక్ష్మి మహా సరస్వతి త్రిమూర్త స్వరూపిణి శ్రీ అల్లూరి పోలేరమ్మ దేవి ఉగాది ఉత్సవంలో  భాగంగా ఆదివారం ప్రత్యేక అలంకరణ లో భక్తులకు దర్శనమిచ్చారు. ఉగాది సందర్బంగా శ్రీ పోలేరమ్మ అమ్మవారికి బ్రహ్మశ్రీ దేవులపల్లి పవన్ కుమార్ శర్మ, అమ్మవారికి బ్రహ్మ ముహూర్త సమయంలో షోడశోపచార పూజ, పంచామృత విశేష ద్రవ్యాలతో అమ్మవారికి అభిషేకం నిర్వహించారు. తదనంతరం విశేషం గా అలంకరణ చేశారు. అమ్మవారికి గాయత్రి అష్టోత్తర సహిత గాయత్రి సహస్రనామార్చన నిర్వహించారు.అనంతరం అమ్మవారికి ధూప దీప మహా నైవేద్యం, మంగళహారతి నిర్వహించారు.  భక్తులు అధిక సంఖ్యలో అమ్మవారిని దర్శించి అమ్మవారికి పొంగల్లు  సమర్పించి అమ్మవారి తీర్థ ప్రసాదాలు స్వీకరించారు. ఈ కార్యక్రమం ఆలయ ఈవో ఈదుల చెన్నకేశవరెడ్డి, ఆలయ సిబ్బంది వెన్న శ్రీధర్ రెడ్డి తదితరులు పర్యవేక్షించారు.

గిద్దలూరు: పట్టణం లోని సబ్ జైల్ ను ప్రకాశం జిల్లా ప్రధాన న్యాయమూర్తి  ఏ .భారతి శనివారం తనిఖీ చేశారు.విచారణలో ఉన్న ఖైదీలను ఉంచే రూములను, అందులోని సదుపాయాలను క్షుణ్ణంగా పరిశీలించారు. ఆహార పదార్ధములను మరియు సరుకుల నాణ్యతను పరిశీలించి సంతృప్తి వ్యక్తం చేశారు.   విచారణలో ఉన్న ఖైదీలతో జైల్ లో అందుతున్న సదుపాయాల గురించి అడిగి సంతృప్తి వ్యక్తం చేశారు. వారిపై ఉన్న కేసుల వివరములను అడిగి తెలుసుకున్నారు. ప్రతి ఒక్కరూ మానవ విలువలను కాపాడు కోవాలి అన్నారు. కేసుల నుండి బయటకు వచ్చిన వారు క్రమశిక్షణతో మెలగాలన్నారు. స్వతహాగా న్యాయవాదిని పెట్టుకునే ఆర్థిక స్తోమత లేని వారికి, వారి కేసులను వాదించటాని ఉచితంగా లాయర్ ను న్యాయ సేవాధికారి సంస్థ ద్వారా పొందవచ్చు అని అన్నారు. వారికి అరెస్టు, బెయిల్ మరియు ఉచిత న్యాయ సహాయం గురించి తెలియజేశారు. ఈ కార్యక్రమంలో జిల్లా ప్రిన్సిపల్ సీనియర్ సివిల్ జడ్జి మరియు జిల్లా న్యాయ సేవాధికార సంస్థ ఇంఛార్జి సెక్రటరీ యస్.హేమలత మరియు గిద్దలూరు ప్రిన్సిపల్ జూనియర్ సివిల్ జడ్జి ఏ. ఓంకార్, సబ్ జైల్ సూపరిండెంట్ యు .లింగారెడ్డి, న్యాయవాది ఎం. పిచ్చయ్య , ఎం.ఎ.రైడర్ బాబు ,పారా లీగల్ వాలంటీర్  అద్దంకి మధుసూధనరావు, సబ్ జైలు సిబ్బంది పాల్గొన్నారు.

తర్లుపాడు : మండలం లోని తుమ్మల చెరువు గ్రామానికి చెందిన పఠాన్ మదార్ వలి (39)  తండ్రి మదార్ వలి అనే వ్యక్తి పురుగు మందు తాగి ఆత్మహత్య కు పాల్పడ్డారు. మందు తాగారని తెలుసుకున్న కుటుంబ సభ్యులు మార్కాపురం ఆసుపత్రికి తీసుకెళ్లగా సీరియస్ అవడం తో  ఒంగోలు  తరలించారు. అక్కడ చికిత్స పొందుతూ మృతి చెందారు. మృతుడికి ఒక బాబు,ఒక పాప ఉన్నారు. కేసు నమోదు చేసి దర్యాప్తు చేస్తున్నట్లు తర్లుపాడు ఎస్ ఐ బి బ్రహ్మనాయుడు తెలిపారు.

మార్కాపురం: మండలం లోని జమ్మనపల్లి సమీపంలో ముద్దసానమ్మ ఆలయం భక్తులతో కిటకిటలాడుతోంది. శనివారం అమ్మవారి కి ప్రత్యేక అలంకరణ చేశారు. అభిషేకాలు, పూజలు నిర్వహించారు. మహిళా భక్తులు పెద్ద సంఖ్యలో హాజరయ్యారు. నిమ్మకాయ దండలతో అమ్మవారికి భక్తులు మొక్కులు తీర్చుకున్నారు.

ఒంగోలు: అట్టడుగు వర్గాల సంక్షేమమే ధ్యేయంగా ఆవిర్భవించిన తెలుగుదేశం పార్టీ 43 వ వ్యవస్థాపక దినోత్సవ వేడుకలు జిల్లా పార్టీ అధ్యక్షులు డాక్టర్ నూకసాని బాలాజీ ఆధ్వర్యంలో శనివారం ఒంగోలులోని పార్టీ కార్యాలయంలో ఘనంగా జరిగాయి. ఈ సందర్భంగా పార్టీ నేతలు స్వర్గీయ ఎన్టీఆర్ విగ్రహానికి పూల మాలలు వేసి ఘనంగా నివాళులర్పించారు.  అనంతరం  జరిగిన కార్యక్రమంలో పార్టీ ఆవిర్భావం నుండి అదే పార్టీలో నేటికి  కొనసాగుతున్న పార్టీ రాష్ట్ర పరిశీలకులు శాసనాల వీరబ్రహ్మం మాట్లాడుతూ స్వర్గీయ నందమూరి తారక రామారావు  ఆధ్వర్యంలో  43 సంవత్సరాలు క్రితం పార్టీని స్థాపించడం జరిగిందని అన్నారు. నాటి నుండి నేటి వరకు అదే పార్టీలో నేను కొనసాగడం అదృష్టంగా భావిస్తున్నానని ఆయన అన్నారు. తెలుగు వారికి అంతర్జాతీయంగా ప్రత్యేకమైన గుర్తింపు, గౌరవం తీసుకొచ్చిన మహోన్నతమైన వ్యక్తి స్వర్గీయ ఎన్టీ రామారావు కాగా,  అలాగే పరిపాలన దక్షితలో విశ్వవ్యాప్తంగా  పేరు ప్రఖ్యాతలు సంపాదించుకున్న గొప్ప వ్యక్తి నేటి ముఖ్యమంత్రి చంద్రబాబు నాయుడు అని అన్నారు. ఎన్టీ రామారావు మొదట్లో ముఖ్యమంత్రి కాగానే రాష్ట్రంలో పరిపాలన రంగంలో అనేక వినూత్న సంస్కరణలు తీసుకొచ్చారని అన్నారు.అందులో భాగంగానే  తెలంగాణ లో పటేల్, కోస్తా ఆంధ్రలో కరణం వ్యవస్థలను  రద్దుచేసి మండల ప్రజా పరిషత్ వ్యవస్థను తీసుకుని రావడం జరిగిందని గుర్తు చేశారు. అలాగే పేదలకు కేజీ ఒక రూపాయికే బియ్యం అందించి వారి జీవితాల్లో వెలుగులు నింపిన మహోన్నతమైన వ్యక్తి ఎన్టీ రామారావు అని అన్నారు. టిడిపి ప్రాంతీయ పార్టీ అయినప్పటికీ జాతీయ భావాలతో దేశ రాజకీయాలలో అనేక దఫాలుగా చక్రం తిప్పి దేశ ప్రజల ఆదారాభిమానాలను చూరగోన్నదని శాసనాల అన్నారు.టిడిపి కి చెందిన బాలయోగి  (దళితుడిని) లోక్ సభ  స్పీకర్ గా,  అలాగే  ప్రముఖ శాస్త్రవేత్త డాక్టర్ అబ్దుల్ కలాం ను రాష్ట్రపతి పదవికి ఎంపిక చేయడంలో టీడీపీ కీలక పాత్ర పోషించిందని ఆయన గుర్తు చేశారు.అట్టడుగు వర్గాల సంక్షేమం కోసం నిరంతరం పాటుపడుతున్న తెలుగుదేశం పార్టీని మరింత బలోపేతం చేయాలని ఆ పార్టీ రాష్ట్ర పరిశీలకులు శాసనాల వీరబ్రహ్మం ప్రజలను కోరారు. మాగుంటకు పరామర్శ  అనారోగ్యానికి గురై ఇటివల బైపాస్ సర్జరీ చేయించుకుని తొలిసారిగా ఒంగోలు వచ్చిన పార్లమెంటు సభ్యులు మాగుంట శ్రీనివాసరెడ్డిని శనివారం ఆయన నివాసంలో శాసనాల మర్యాదపూర్వకంగా కలిసి ఆయనను పరామర్శించారు. ఈ సందర్భంగా ఆయన ఆరోగ్య పరిస్థితి గురించి  అడిగి తెలుసుకున్నారు. ఎంపీ మాగుంట పూర్తిగా ఆయురారోగ్యాలతో తిరిగి ప్రజాక్షేత్రంలోకి రావాలని టిడిపి పరిశీలకులు శాసనాల వీరబ్రహ్మం ఆకాంక్షించారు.

గిద్దలూరు:గిద్దలూరు మార్కెట్ యార్డ్ చైర్మన్ గా బైలడుగు బాలయ్య నియమితులయ్యారు. శుక్రవారం తెలుగుదేశం పార్టీ నామినేట్ పదవులను భర్తీ చేస్తూ జాబితాను విడుదల చేసింది. సుదీర్ఘ రాజకీయ అనుభవం ఉన్న బాలయ్యను సీఎం చంద్రబాబు మార్కెట్ యార్డు చైర్మన్ గా ప్రకటించడంపై హర్షం వ్యక్తం చేస్తున్నారు. మార్కెట్ యార్డ్ చైర్మన్ గా బాధ్యతలు చేపట్టనున్న బాలయ్యకు పలువురు శుభాకాంక్షలు తెలిపారు.