విడదల రజినీ... తెలుగు రాజకీయాల్లో పెద్దగా పరిచయం చేయాల్సిన అవసరం లేని పేరు. తెలుగుదేశం పార్టీ మహానాడు వేదికపైన సైబరాబాద్‌లో మీరు నాటిన మొక్కను సార్‌ నేను అంటూ చంద్రబాబుపైన పొగడ్తల జల్లు కురిపించిన రజిని... సరిగ్గా ఏడాదికే వైసీపీలో చేరిపోయారు. సీనియర్లను కాదని ఎమ్మెల్యే టికెట్‌ తెచ్చుకున్నారు. అనతి కాలంలోనే పార్టీలో కీలక నేతగా గుర్తింపు తెచ్చుకున్న రజినీ... సోషల్‌ మీడియాలో ఫుల్ యాక్టీవ్‌ కూడా. దీంతో రాష్ట్ర వ్యాప్తంగా ప్రత్యేక ఫ్యాన్‌ ఫాలోయింగ్‌ కూడా ఉంది. ఇక మంత్రివర్గ పునర్‌వ్యవస్థీకరణలో మంత్రిపదవి కూడా పొందారు. తొలిసారి ఎమ్మెల్యేగా గెలిచిన రజినీని మంత్రి పదవి వరించడం వెనుక వైసీపీలో నెంబర్‌ టూ స్థాయి వ్యక్తి లాబీయింగ్‌ ఉందనే పుకార్లు పెద్ద ఎత్తున షికారు కూడా చేశాయి. చిలకలూరిపేట నియోజకవర్గం నుంచి సీనియర్‌ నేత, రాజకీయ గురువు ప్రత్తిపాటి పుల్లారావుపై ఘన విజయం సాధించిన విడదల రజినీకి జగన్‌ గట్టి షాక్ ఇచ్చారు. సరిగ్గా ఎన్నికలకు ఐదు నెలల ముందు రజినీని చిలకలూరిపేట నుంచి గుంటూరు పశ్చిమ నియోజకవర్గానికి మార్చారు. టీడీపీ కంచుకోటగా గుర్తింపు తెచ్చుకున్న గుంటూరు వెస్ట్ నియోజకవర్గంలో గెలవాలంటే తీవ్రంగా శ్రమించాల్సిందే. అందుకే అప్పట్లో కార్యాలయంపై దాడి చేశారని... తనపై హత్యాయత్నానికి ప్రయత్నించారంటూ హడావుడి చేశారు కూడా. అదే సమయంలో తన దగ్గర డబ్బులు తీసుకుని మోసం చేశారంటూ వైసీపీ నేతలే బహిరంగంగా ఆరోపణలు చేయడంతో.. రజినీ ఒక్కసారిగా సైలెంట్‌ అయ్యారు. బీసీ కార్డు ద్వారా ఎన్నికల్లో గెలుపు కోసం శ్రమించినప్పటికీ... పెద్దగా ఫలితం చూపించలేదు.ఎన్నికల్లో ఓటమి తర్వాత కొద్ది రోజుల పాటు సైలెంట్‌గా ఉన్నారు. ఒకదశలో రజినీ కూడా పార్టీ మారుతారనే మాట బలంగా వినిపించింది. ఇక మాజీ మంత్రి బాలినేని శ్రీనివాసరెడ్డిని బుజ్జగించే బాధ్యతలను విడదల రజినీకే జగన్ అప్పగించారు. అందుకోసం రజినీ చేసిన ప్రయత్నాలన్నీ విఫలమయ్యాయి. ఇక మొన్నటి ఎన్నికల్లో చిలకలూరిపేట నుంచి పోటీ చేసిన కావలి మనోహర్‌ నాయుడు ఓడిన తర్వాత అడ్రస్‌ లేకుండా పోయారు. దీంతో చిలకలూరిపేట నియోజకవర్గం ఇంఛార్జ్‌ బాధ్యతలను విడదల రజినీకి మరోసారి అప్పగించారు జగన్‌. వాస్తవానికి రజినీకి చిలకలూరిపేటలో మంచి పేరు లేదు. భూ కబ్జా ఆరోపణలతో పాటు స్థానిక క్యాడర్‌తోనే సఖ్యత లేదు. అందుకే రజినీని గుంటూరు వెస్ట్‌ నియోజకవర్గానికి జగన్‌ మార్చారు. అయితే ఇప్పుడు మళ్లీ చిలకలూరిపేట బాధ్యతలు అప్పగించడంతో స్థానిక నేతలు తీవ్ర వ్యతిరేకత వ్యక్తం చేస్తున్నారు. రజినీని మార్చకపోతే... తామంతా మారిపోతామని జగన్‌కు అల్టిమేటం జారీ చేశారు.

అమరావతి: కొద్ది రోజుల క్రితం అమరావతి డ్రోన్ సమ్మిట్ 2024ను ఏపీ ప్రభుత్వం ఘనంగా నిర్వహించిన సంగతి తెలిసిందే. డ్రోన్ల టెక్నాలజీ ఓ గేమ్‌ ఛేంజర్‌ అని, డ్రోన్ల సాయంతో రౌడీ షీటర్లకు, అసాంఘిక శక్తులకు చంద్రబాబు ఛాలెంజ్ విసిరారు. డ్రోన్ల ద్వారా విజిబుల్ పోలీసింగ్ తగ్గిస్తామని, ఇన్విజిబుల్ పోలీసింగ్ ద్వారా అసాంఘిక శక్తులు, రౌడీ షీటర్ల ఆట కట్టిస్తామని అన్నారు. ఈ క్రమంలోనే చంద్రబాబు విజన్ ను ఏపీ పోలీసులు రియాలిటీలో చేసి చూపించారు. డ్రోన్ టెక్నాలజీ ఉపయోగించి గంజాయి పంటను ఏపీ పోలీసులు ధ్వంసం చేసిన వైనం చంద్రబాబు విజన్ కు తాజా నిలువెత్తు తార్కాణంగా నిలిచింది. అల్లూరి సీతారామరాజు జిల్లాలో భారీగా సాగు చేస్తున్న గంజాయి పంటను డ్రోన్ టెక్నాలజీ ఉపయోగించి ఏపీ పోలీసులు ధ్వంసం చేశారు. డ్రోన్ అడ్వాన్స్ డ్ టెక్నాలజీని ఉపయోగించిన అల్లూరి సీతారామరాజు జిల్లా పోలీసులు…5 ఎకరాల విస్తీర్ణంలో సాగు చేస్తున్న గంజాయి పంటను గుర్తించారు. జీ మాడుగుల మండలంలోని డేగలరాయి గ్రామంలో గుర్తించిన ఆ గంజాయి పంటను పోలీసులు తగులబెట్టారు. ఆ గంజాయి పంటను పండిస్తున్న వారిపై చట్టపరమైన చర్యలు తీసుకుంటామని పోలీసులు తెలిపారు. తాజా ఘటన నేపథ్యంలో చంద్రబాబుపై సోషల్ మీడియాలో ప్రశంసలు కురుస్తున్నాయి. టెక్నాలజీని వాడడంలో, ఆ టెక్నాలజీని సమాజహితం కోసం ఉపయోగించడంలో సీఎం చంద్రబాబు ఎప్పుడూ ఒక అడుగు ముందే ఉంటారని నెటిజన్లు పొగడ్తలతో ముంచెత్తుతున్నారు. విజన్ 2020 అంటూ ఆనాడు ఐటీ రంగంలో జరగబోయే డెవలప్ మెంట్ ను చంద్రబాబు 20 ఏళ్ల ముందే గుర్తించారని, అదే తరహాలో డ్రోన్ టెక్నాలజీ వినియోగం గురించి విజన్ 2047 అంటూ చంద్రబాబు 20 ఏళ్ల ముందే చెప్పారని అంటున్నారు. అమరావతిని డ్రోన్ క్యాపిటల్ చేస్తే ప్రపంచం మొత్తం ఏపీవైపు చూస్తుందని చెబుతున్నారు.

AP: గుంటూరులో జగన్ ఎప్పుడు పర్యటించినా పక్కన విడదల రజనీ ఉంటున్నారు. కానీ ఆమె ఒక్క మాట మాట్లాడటం లేదు. గతంలో ప్రెస్మీట్లు పెట్టేవారు. ఈ మధ్య అదీ కూడా లేదు. శ్యామల మాట్లాడేదే ఎక్కువ అన్నట్లుగా ఉంది. అయితే మరో గుంటూరు మేడమ్ మేకతోటి సుచరిత జగన్ తో పాటు పర్యటనల్లో కూడా పాల్గొనడం లేదు ఓ వైపు జగన్‌తో పాటు టూర్లలో పాల్గొంటున్నా జనసేన తో విడదల రజనీ చర్చలు అయిపోయాయని చెప్పుకుంటున్నారు. సుచరిత అయితే ఏ పార్టీతో టచ్ లోకి వెళ్లారో కూడా అర్థం కావడం లేదు కానీ ఆమె కూడా రెడీగా ఉన్నారంటున్నారు. జగన్మోహన్ రెడ్డితో కలిసి ప్రయాణిస్తే తాను మునిగిపోవడమే కాదు తమనూ ముంచుతారని అందరికీ ఇప్పుడిప్పుడే క్లారిటీ వస్తోంది. అధికారంలో ఉన్నప్పుడు చేసిన అడ్డగోలు పనులతో ఎలా తప్పించుకోవాలో తెలియక సతమతమవుతూంటే.. పార్టీపై ఆశల్లేకుండా జగన్ రెడ్డి కుటుంబ వివాదాలను సైతం సిల్లీ కారణాలతో ప్రజల్లోకి చర్చకు పెడుతున్న విధానం అందర్నీ ఆశ్చర్యంలో ముంచెత్తుతోంది. ఇలాంటి విషయాల్లో ప్రజల్లో ఎలాంటి పరిణామాలకు కారణం అవుతాయో కనీసం ఊహించలేకపోతున్నారని.. ఆ మాత్రం తెలివి తెలివిలేదా అనుకుంటున్నారు. గుంటూరులో జగన్ రెడ్డికి నికంగా మిగిలేది నలుగురు చిల్లర పనులు చేసే రౌడీ బ్యాచ్ ను వెంటేసుకుని తిరిగే అప్పిరెడ్డి మాత్రమేనని గుసగుసలు వినిపిస్తున్నాయి. ఇప్పటికే మద్దాళి గిరి కూడా గుడ్ బై చెప్పారు. బతికుంటే బలుసాకు తినవచ్చు కానీ జగన్ తో ఉంటే అది కూడా ఉండదని ఆయన ఫిక్సయిపోయారు. చాలా మంది నేతలు జనసేనతో సంప్రదిపుల్లో ఉన్నారు. సమయం చూసి ఒక్కొక్కరు గట్టిగా షాక్ ఇచ్చే అవకాశాలు ఉన్నాయి.

ఆంధ్రప్రదేశ్ రాష్ట్ర ప్రజలకు చంద్రబాబు సర్కార్ భారీ శుభవార్త వినిపించింది. రాష్ట్రంలో రవాణా వ్యవస్థను మెరుగు పర్చటంపై ప్రభుత్వం ప్రత్యేక దృష్టి సారించింది. ప్రముఖ పట్టణాల మధ్య కనెక్టివిటీ పెరిగేలా రహదారుల నిర్మాణానికి శ్రీకారం చుట్టింది.  ఈమేరకు.. రాష్ట్రంలో నాలుగు గ్రీన్ ఫీల్ట్ హైవేలు నిర్మించనున్నట్టు సీఎం చంద్రబాబు నాయుడు ప్రకటించారు. రాష్ట్రంలో నిర్మించబోయే 4 గ్రీన్‌ఫీల్డ్‌ హైవేలకు సుమారు 45 వేల 300 కోట్లు అవసరమవుతాయని చంద్రబాబు పేర్కొన్నారు. ఇందులో.. హైదరాబాద్ నుంచి మచిలీపట్నాన్ని కనెక్ట్ చేసేలా గ్రీన్ ఫీల్డ్ హైవే వస్తుందని చంద్రబాబు వెల్లడించారు. 18 వేల కోట్లతో ముందుగా పనులు పూర్తి చేస్తారని చంద్రబాబు చెప్పుకొచ్చారు. జాతీయ రహదారుల అధికారులు, ఏజెన్సీలతో సమీక్ష నిర్వహించామని సీఎం చంద్రబాబు చెప్పుకొచ్చారు. రాష్ట్రంలో 15 ప్రాజెక్టులు నిలిచిపోయాయని.. 70 ప్రాజెక్టులకు భూసేకరణ సమస్యలు, 21 ప్రాజెక్టులకు అటవీ భూముల సమస్యలు, 3 ప్రాజెక్టులకు టోల్‌ప్లాజా సమస్యలు ఉన్నాయని వివరించారు. ఆరు ప్రాజెక్టులు బిడ్డింగ్ దశలో ఉన్నాయని తెలిపారు. ఇవన్నీ 3 నెలల్లో సరిచేస్తామని సీఎం చంద్రబాబు తెలిపారు. రాష్ట్రంలో చేపట్టబోయే ప్రాజెక్టులన్నింటికీ 3 నెలల్లో భూసేకరణ పూర్తి చేయాలని అధికారులను సీఎం చంద్రబాబు ఆదేశించారు. ఈ క్రమంలో.. రణస్థలం నుంచి శ్రీకాకుళానికి హైవే మంజూరు చేయటాన్ని స్వాగతిస్తున్నామని చంద్రబాబు తెలిపారు. ఎన్‌హెచ్‌-42లో పాడేరు బైపాస్, బైరెడ్డిపల్లి నుంచి వి.కోట, బెంగళూరు హైవే విషయంలోనూ చర్చించినట్టు చంద్రబాబు తెలిపారు. ఏపీకి మరో మూడు పోర్టులు రానున్నాయని తెలిపిన సీఎం చంద్రబాబు.. లాజిస్టిక్స్ హబ్‌గా ఏపీ మారనుందని తెలిపారు. ఆక్వా కల్చర్, హార్టికల్చర్ వల్ల ఎగుమతులు పెరిగే అవకాశం ఉందని చంద్రబాబు తెలిపారు. రైల్వేలో 70 వేల కోట్ల ప్రాజెక్టులు ఉన్నాయని చెప్పుకొచ్చారు. స్పీడ్ ఆఫ్ డూయింగ్ బిజినెస్ ఇంకా ఎఫెక్టివ్‌గా ఉండాలని అధికారులను చంద్రాబాబు ఆదేశించారు. పరిటాల దగ్గర మల్టీమోడల్ లాజిస్టిక్స్ పార్కులు రానున్నట్టు చెప్పుకొచ్చారు. ప్రతి సామాన్యుడికి ఇసుక అందించాలనే ఉచిత ఇసుక విధానం తీసుకొచ్చామని చంద్రబాబు తెలిపారు. ఇసుక విధానంలో గత ప్రభుత్వంలో మోనోపోలీ తీసుకొచ్చారని గుర్తు చేశారు. గత ప్రభుత్వం సహజ వనరులను లూటీ చేసిందని మండిపడ్డారు. ఇప్పుడు ఇసుక కావాల్సిన వాళ్లే తవ్వుకుని తీసుకెళ్లే అవకాశం ఉందన్నారు. ఒక్కొక్కటిగా అన్ని అంశాలను ట్రాక్‌లో పెడుతున్నామన్నారు. నాలుగు నెలల్లో ఆలోచనా విధానంలో మార్పు తెచ్చామని చంద్రబాబు తెలిపారు. త్వరలో వాట్సాప్ గవర్నెన్స్ కూడా తీసుకొస్తున్నామని.. దానిపై లోకేష్ ఆ కంపెనీలతో చర్చలు జరుపుతున్నారని చెప్పుకొచ్చారు. విధ్వంసానికి చిరునామాగా ఉన్న ఏపీని అభివృద్ధికి చిరునామాగా చేస్తున్నామన్నారు. రాబోయే రోజుల్లో అమరావతి రైల్వే లైన్ మరింతగా పెంచుకోవాల్సి వస్తుందని చంద్రబాబు చెప్పుకొచ్చారు. మిగిలిన రైళ్లు కూడా వస్తే.. అన్నిరకాల అభివృద్ధి జరుగుతుందని చెప్పుకొచ్చారు.

అమరావతీ: పోలవరం సంగతులు తెలుసుకునేందుకు నేను హైదరాబాద్ వెళ్లాను. నలుగురు ముఖ్యమంత్రి వద్ద పనిచేసిన ఒక పెద్ద అధికారిని కలిశాను. ఆయన చెప్పుకొచ్చాడు పోలవరం కట్టాలంటే 30 లక్షల మంది గిరిజనులను తరలించాల్సి ఉంటుందన్నారు. అంతేకాదు పోలవరం ప్రాజెక్టు కట్టే సామర్థ్యం ఇక్కడి కాంట్రాక్టర్లకు, కంపెనీలకు లేదని, ఒకవేళ కట్టినా అది కూలిపోతుందని ఆ అధికారి నాతో అన్నారు. పోలవరం ప్రాజెక్టు కట్టగలిగే కంపెనీలు ప్రపంచంలో మూడే ఉన్నాయి. అవి చైనా, అమెరికా, జర్మనీ లో ఉన్నట్లు చెప్పారు. జల యజ్ఞం ధనయజ్ఞంగా మారింది. పోలవరం పొలిటీషియన్లకు వరంగా మారింది.పోలవరం పేరు పెట్టి, కొందరు పెద్దలు దోచుకు తిన్నారు. అమరావతి పూర్తి కాలంటే ఇంకో వందేళ్లు పడుతుంది. అప్పటికీ పూర్తవుతుందన్న నమ్మకం నాకు లేదు.1905 ఢిల్లీ రాజధాని మొదలైతే, ఢిల్లీ ఒక మహానగరంగా తయారు కావడానికి ఇన్నేళ్లు పట్టింది. చంద్రబాబు నాయుడు పొద్దున లేస్తే రాత్రి వరకు అమరావతి, పోలవరం అంటారు. మొన్న లడ్డూ, నిన్న డ్రోన్ ఇలా నెలకో అంశాన్ని తెరమీదకు తెచ్చి, అబద్ధాలు చెప్పుకుంటూ కాలం గడుపుతున్నారు.  భారతదేశంలో ప్రజాస్వామ్యం నిలబడాలంటే బ్యాలెట్ ద్వారానే ఎన్నికలు జరపాలి. ప్రతిపక్షాలు బలహీనంగా ఉన్న చోట బిజెపి ఈవీఎం ల ట్యాంపరింగ్ చేస్తోంది. రాష్ట్ర విభజన తర్వాత ఆంధ్రప్రదేశ్ బాగా నష్టపోయింది. కనీసం బడ్జెట్ ప్రవేశపెట్టే పరిస్థితి లేదు.14 ఏళ్ళు ముఖ్యమంత్రిగా పని చేసి, పెద్ద అనుభవం ఉన్న చంద్రబాబు నాయుడు బిజెపితో ఉన్న పరిచయాలతో బడ్జెట్ ను ప్రవేశ పెట్టుకోవచ్చు కదా!?రాష్ట్ర విభజన ఎందుకు జరిగింది? మాట్లాడితే ఆమె చేసింది! ఆయన వల్ల జరింది అంటుంటారు కొందరు. రాష్ట్ర విభజనకు అసలు సంగతి వేరే ఉంది.1994లో కాన్సిరాం అనే వ్యక్తి యూపీ తర్వాత ఏపీలో అడుగు పెట్టాడు. ఆ మూల నుంచి ఈ మూల వరకు తిరిగాడు. కత్తి పద్మారావు వంటి దళిత నాయకులను ఉత్తేజపరిచాడు.‌ దళితులు ఐక్యం చేశాడు. దళితుల ఐక్యతమనకు మనకు నష్టం చేస్తుందని గ్రహించిన కొందరు నాయకులు దళితులను మాల- మాదిగలుగా విడగొట్టారు. వేరు చేశారు.  నేడు మాల మాదిగలు వీధుల్లోకొచ్చారు. కొట్టుకుంటున్నారు."చెడపకురా చెడేవు అన్న చందంగా" ఒక్కటి గా ఉన్న దళితులను మాల - మాదిగలుగా విభజించడం వల్ల రాష్ట్రం రెండు ముక్కలైంది.నిన్న నేను హైదరాబాదులో ఉన్నాను. సెక్రటేరియట్ వెళ్లి చూశాను. నా కళ్ళు చాలలేదు ఆ సెక్రటేరియట్ ని చూసేదానికి. అంత అద్భుతంగా కట్టుకున్నారు. తెలంగాణ మంత్రుల ఛాంబర్లు మహారాజా ప్యాలస్ లాగా వుంది.మన దగ్గర ఐదు షెడ్లు వేసుకున్నారు. ఎవరెక్కడ ఉంటారో ఎవరికీ తెలీదు.  హర్యానాలో కాంగ్రెస్ ఓడిపోవడానికి రెండు ప్రధాన కారణాలు. ఒకటి కాంగ్రెస్ నాయకుల ఓవర్ కాన్ఫిడెన్స్. రెండు ఈవీఎం ట్యాంపరింగ్. ఎన్నికల ఫలితాలు రాకముందే, హర్యానా కాంగ్రెస్ నాయకులు ఢిల్లీలో కూర్చొని, పదవుల పంపకాలుపై మంతనాలు జరిపారు. 14 ఏళ్లు ముఖ్యమంత్రిగా పనిచేసిన అనుభవమున్న చంద్రబాబు నాయుడు, రాష్ట్రంలోని నిరుద్యోగం, టాక్స్ లు తగ్గించడం, ఆకలి, మహిళలకు ఉచిత ఆర్టీసీ బస్సు ప్రయాణం, సూపర్ 6 హామీలను వెంటనే అమలు చేయాలని కేంద్ర మాజీ మంత్రి, కాంగ్రెస్ పార్టీ సీనియర్ నాయకులు చింతామోహన్ డిమాండ్ చేశారు.

Telangana: పదేళ్లు ఏకఛత్రాధిపతిగా వెలుగు వెలిగిన బీఆర్ఎస్‌కు ఇప్పుడు కాలం అస్సలు కలిసి రావడం లేదు. నా మాటే శాసనం అన్నట్లుగా పదేళ్ల పాటు పాలన సాగింది. అయితే ఉద్యమ పార్టీగా మొదలైన తెలంగాణ రాష్ట్ర సమితి పేరును ఎప్పుడైతే భారత రాష్ట్ర సమితిగా మార్చారో... అప్పటి నుంచి అన్ని కష్టాలే. ఇక ఎన్నికల ఓడిన దగ్గర నుంచి బీఆర్ఎస్ పరిస్థితి నానాటికి తీసికట్టుగా మారిపోయింది. మనదే గెలుపు అని ధీమా వ్యక్తం చేసిన నేతలంతా ఓడిపోయారు. హ్యాట్రిక్ కొడుతున్నామని గొప్పగా చెప్పుకున్న కేటీఆర్‌కు షాక్ తగిలింది. దానికి తోడు ఏడాది కాలంగా పార్టీ అధినేత బయటికి వచ్చిన సందర్భాలే లేవు. పార్లమెంట్ ఎన్నికల సమయంలో ప్రచారం చేసినప్పటికీ కనీసం ఒక్కచోట కూడా గెలవలేదు. పైగా డిపాజిట్లు రాలేదనే అపవాదు మూటగట్టుకుంది.  ఏడాది కాలంగా కాంగ్రెస్ ప్రభుత్వాన్ని ఇబ్బంది పెట్టాలని చూసిన ప్రతిసారి బీఆర్ఎస్‌కు ఎదురుదెబ్బలు తగులుతూనే ఉన్నాయి. తొలి రోజుల్లో సూపర్ సిక్స్ అమలు ఎప్పుడూ అని ప్రశ్నించారు. అయితే అధికారంలోకి వచ్చిన వెంటనే మహిళలకు ఉచిత బస్సు ప్రయాణం, రూ.500కే గ్యాస్ సిలిండర్ పథకాలు అమలు చేయడంతో కొద్ది రోజులు సైలెంట్ అయ్యారు. ఇక ఆ తర్వాత రైతు రుణమాఫీ అంశంపై సవాళ్లు చేశారు. ఆగస్టు 15 నాటికి హామీ ఇచ్చినట్లుగా రైతు రుణమాఫీ చేయకపోతే రాజీనామా చేస్తానంటూ మాజీ మంత్రి హరీష్ రావు సవాల్ విసిరారు. అయితే చెప్పినట్లుగానే రూ.1.50 లక్షల లోపు ఉన్న రుణాలను తెలంగాణ సర్కార్ మాఫీ చేసింది. దీంతో... రూ.2 లక్షల రుణం మాఫీ చేయలేదు కదా అంటూ ఇప్పుడు కొత్త పాట పాడుతున్నారు. ఇక ఆక్రమణల తొలగింపు కోసం హైడ్రాను తెరపైకి తీసుకువచ్చిన కాంగ్రెస్. దీంతో హైడ్రా అక్రమం అంటూ తెగ గోల పెట్టారు. చివరికి హైకోర్టుకు కూడా వెళ్లారు. అయితే హైకోర్టులో పిటిషన్ దారులకు చుక్కెదురైంది. హైడ్రా వల్ల ఎలాంటి ఇబ్బందులు లేవని... దానిని కొనసాగించవచ్చంటూ తెలంగాణ హైకోర్టు తీర్పు చెప్పింది. దీంతో హైడ్రా మరోసారి రంగంలోకి దిగేందుకు సిద్ధమైంది. ఇదే సమయంలో మూసీ ప్రక్షాళన అంశంపై వివాదం చెలరేగింది. దీంతో మరో అంశం దొరికింది అంటూ బీఆర్ఎస్ నేతలు ధర్నాలు, ఆందోళనకు పిలుపునిచ్చారు. దీనికి చెక్ పెట్టేలా ఆక్రమణ దారులకు రేవంత్ సర్కార్ డబుల్ బెడ్ రూమ్ ఇళ్లను కేటాయించింది. అలాగే మూసీ ప్రక్షాళనకు కేంద్ర పెద్దలు కూడా లోపాయికారిగా మద్దతు తెలపడంతో బీఆర్ఎస్ నేతలు సైలెంట్ అయ్యారు.  ఇక తాజాగా గ్రూప్ 1 మెయిన్స్ పరీక్ష విషయంలో బీఆర్ఎస్ నేతలకు ఊహించని షాక్ తగిలింది. పరీక్ష వాయిదా వేయాలని... జీవో రద్దు చేయాలంటూ కొంతమంది నిరుద్యోగులతో కలిసి ధర్నాలు, ఆందోళనలు చేపట్టారు. అలాగే హైకోర్టులో, సుప్రీంకోర్టులో పిటిషన్లు దాఖలు చేశారు. హైకోర్టులో వ్యతిరేకంగా తీర్పు వచ్చింది. ఇక సరిగ్గా పరీక్ష రోజు సుప్రీం కోర్టులో తమకు అనుకూలంగా తీర్పు వస్తుందని... పరీక్షల నిర్వహణపై స్టే వస్తుందని గంపెడంత ఆశ పెట్టుకున్నారు గులాబీ పార్టీ నేతలు. అయితే సుప్రీం కోర్టు మాత్రం తెలంగాణ ప్రభుత్వానికి అనుకూలంగా తీర్పు ఇచ్చింది. స్టే ఇచ్చేది లేదని తేల్చేసింది. దీంతో పరీక్షలు ప్రారంభమయ్యాయి కూడా.  ఎన్నికల హామీల అమలుతో పాటు హైదరాబాద్ నగరాభివృద్ధి, మూసీ ప్రక్షాళన, హైడ్రా, గ్రూప్ -1, రైతు రుణ మాఫీ... ఇలా ఏ అంశం తీసుకున్నా సరే... బీఆర్ఎస్‌కు ఎదురుదెబ్బలే తగులుతున్నాయి. దీంతో గులాబీ పార్టీ నేతలు ఏం చేయాలో కూడా అర్థం కాని స్ధితిలో ఉన్నారు.

New Delhi: ప్రియాంక గాంధీ రాజకీయ ఆరంగేట్రానికి ముహుర్తం ఖరారైంది. వయానాడ్ పార్లమెంట్ ఉప ఎన్నికల్లో పోటీ చేసేందుకు ప్రియాంక సిద్ధమయ్యారు. అచ్చు పోలినట్లు నానమ్మ ఇందిరా గాంధీలా ఉండటంతో ప్రియాంకకు ఫ్యాన్ ఫాలోయింగ్ ఎక్కువ. ఇక పబ్లిక్‌‍ను ఆకట్టుకోవడంలో కూడా ప్రియాంక ఆరితేరిపోయారు. అన్న రాహుల్ గాంధీతో కలిసి ఇప్పటికే ఎన్నో రాజకీయ వేదికలపై ప్రసంగించారు. అలాగే పార్టీ గెలుపు కోసం దేశవ్యాప్త పర్యటన చేశారు. తెలంగాణ ఎన్నికల్లో పార్టీ గెలుపు బాధ్యతను ప్రియాంక భుజానికెత్తుకున్నారు కూడా. తెలంగాణలో మహిళా డిక్లరేషన్ సహా పలు కీలక హామీలను ప్రియాంక స్వయంగా చేశారు. ఉత్తరప్రదేశ్ అసెంబ్లీ ఎన్నికల సమయంలో ప్రియాంకను ముఖ్యమంత్రి అభ్యర్థి అంటూ తెగ ప్రచారం కూడా చేశారు. అయితే ఇవన్నీ సోషల్ మీడియా పుకార్లే అని అప్పట్లో తేల్చేశారు. ఇక గత పార్లమెంట్ ఎన్నికల్లో వయనాడ్, రాయ్ బరేలి నియోజకవర్గాల నుంచి పోటీ చేసిన కాంగ్రెస్ నేత రాహుల్ గాంధీ... రెండు చోట్ల గెలిచారు. అయితే ఉత్తరప్రదేశ్ ఎన్నికలను దృష్టిలో పెట్టుకుని రాయ్ బరేలిని అట్టిపెట్టుకుని వయానడ్‌ నియోజకవర్గానికి రాజీనామా చేశారు. దీంతో వయనాడ్ నుంచి ఎవరు పోటీ చేస్తారనే అంశం మరోసారి తెరపైకి వచ్చింది. అయితే వయనాడ్ నుంచి ప్రియాంక పోటీ చేస్తారని ఇటీవల జరిగిన పార్టీ కార్యవర్గ సమావేశంలో తీర్మానం చేశారు. నవంబర్ 13న జరగనున్న ఉప ఎన్నిక కోసం బుధవారం ప్రియాంక నామినేషన్ దాఖలు చేయనున్నారు. నవంబర్ 23 న ఫలితాలు వెలువడనున్నాయి.  అయితే వయనాడ్ నుంచి తొలిసారి ప్రత్యక్ష ఎన్నికల్లో పోటీ చేయనున్న ప్రియాంక కోసం ఇప్పుడు కాంగ్రెస్ అగ్రనేతలంతా రంగంలోకి దిగనున్నారు. కాంగ్రెస్ గౌరవాధ్యక్షురాలు సోనియా గాంధీ వయనాడ్‌లో ప్రియాంక కోసం ప్రచారం చేయనున్నట్లు తెలుస్తోంది. అనారోగ్య సమస్యల కారణంగా ఈ మధ్యకాలంలో సోనియా గాంధీ రాజకీయాలకు దూరంగా ఉంటున్నారు. అయితే తొలిసారి తనయ ప్రియాంక పోటీ చేస్తుండటంతో... గెలుపే లక్ష్యంగా సోనియా ప్రచారం చేయనున్నారు. దీంతో వయనాడ్ ఎన్నిక ఆసక్తికరంగా మారింది.

Amaravati: మద్యం మాఫియా... గత ఐదేళ్ల వైసీపీ సర్కార్‌లో ఇదే మాట పెద్ద ఎత్తున వినిపించింది. ఇంకా చెప్పాలంటే అధికార పార్టీపై ప్రతి రోజు విమర్శలు చేశారు ప్రతిపక్ష నేతలు. ప్రభుత్వమే నేరుగా మద్యం దుకాణాలు నిర్వహించడం వల్ల ఆదాయం నేరుగా ప్రభుత్వ ఖజనాకే వస్తుందని వైసీపీ సర్కార్ చెప్పుకొచ్చింది. అయితే ఎక్కడా యూపీఐ చెల్లింపులు లేకపోవడం... కేవలం నగదు బదిలీ వల్లే అమ్మకాలు చేయడం పై పెద్ద ఎత్తున విమర్శలు వెల్లువెత్తాయి. దీనికి తోడు నాసిరకం బ్రాండ్‌లతో ప్రజల జీవితాలతో చెలగాటం ఆడారనే అపవాదు కూడా వైసీపీ సర్కార్ మూటగట్టుకుంది. బ్రాండెడ్ మద్యం కోసం మందుబాబులు ఇతర రాష్ట్రాలకు క్యూ కట్టారు కూడా. విచిత్రమైన పేర్లతో నాసిరకం మద్యం అంటగట్టింది వైసీపీ సర్కార్. దీంతో మందు బాబులు సైతం జగన్ సర్కార్‌పై ఆగ్రహం వ్యక్తం చేశారు. అధికారంలోకి వచ్చిన వెంటనే నూతన మద్యం పాలసీపై చంద్రబాబు సర్కార్ కసరత్తు చేసింది. అక్టోబర్ నుంచి ప్రైవేటు మద్యం షాపులకు అనుమతి మంజూరు చేసింది. అలాగే ఏపీ వ్యాప్తంగా 3,396 షాపులకు ఆన్ లైన్ ద్వారా టెండర్లు ఆహ్వానించింది. ఇక అంతే... తన మన అనే బేధం లేకుండా నేతలు రంగంలోకి దిగారు. ఐదేళ్ల పాటు మద్యం వ్యాపారానికి దూరంగా ఉన్న నేతలంతా ఇప్పుడు జూలు విదిలించారు. అప్లికేషన్ దాఖలుకు కూడా తమ అనుమతి తీసుకోవాల్సిందే అని కొందరు అధికార పార్టీ ఎమ్మెల్యేలు హుకుం కూడా జారీ చేశారు. కొన్ని చోట్ల అయితే రాజకీయ వైరాన్ని పక్కన పెట్టి టీడీపీ, వైసీపీ నేతలు చెట్టాపట్టాలేసుకుని మరి మద్యం టెండర్లు దాఖలు చేశారు. ఈ విషయం బయటకు తెలియటంతో సీఎం చంద్రబాబు తీవ్ర ఆగ్రహం వ్యక్తం చేశారు. కఠిన చర్యలు తప్పవని హెచ్చరించారు. దీంతో కొందరు నేతలు వెనక్కి తగ్గారు. ఇక లాటరీలో షాపుల కేటాయింపు పూరైన తర్వాత అసలు సినిమాకు తెరలేపారు కొందరు ప్రజాప్రతినిధులు. షాపు దక్కించుకున్న వారిని నేరుగా బెదిరించారు. కొన్ని చోట్ల దాడులు కూడా చేశారు. షాపు ఎలా నడుపుతావో చూస్తామంటూ వార్నింగ్ ఇచ్చారు. మాకు ఇచ్చేసి... మేము ఇచ్చింది తీసుకుని పో అంటూ భయపెట్టారు. పైకి పారదర్శకంగానే షాపుల కేటాయింపు జరిగినప్పటికీ... తెర వెనుక మాత్రం వ్యాపారం కోసం వచ్చిన వారికి బెదిరింపులు ఎదురయ్యాయి. చివరికి డీడీలు తీసిన తర్వాత కూడా కొందరు వ్యాపారులు బెదిరింపులకు భయపడి రాజీ చేసుకునేందుకు నేరుగా ప్రజాప్రతినిధితోనే సమావేశమయ్యారు. ఈ విషయంపై పెద్ద ఎత్తున ఆరోపణలు రావడంతో... స్వయంగా సీఎం చంద్రబాబు రంగంలోకి దిగారు. ఈ నెల 18న ఎమ్మెల్యేలు, ఎమ్మెల్సీలతో అత్యవసర సమావేశం ఏర్పాటు చేశారు. ప్రధానంగా ఇసుక, మద్యం వ్యవహారాల్లో వస్తున్న ఆరోపణలపైనే చంద్రబాబు చర్చించనున్నట్లు తెలుస్తోంది. గత ప్రభుత్వంపై విమర్శలు వెల్లువెత్తిన ఇసుక, మద్యం వ్యాపారాల్లో జోక్యం చేసుకోవద్దని ఎమ్మెల్యేలు, ఎమ్మెల్సీలకు చంద్రబాబు వార్నింగ్ ఇవ్వనున్నట్లు తెలుస్తోంది. సమావేశానికి రావాల్సిందిగా కేంద్ర కార్యాలయం నుంచి ఫోన్ రావడంతో పార్టీ ఎమ్మెల్యేలు కలవరపడుతున్నారు. ఏ విషయంపై అధినేతతో మాట పడాల్సి వస్తుందో అని భయపడుతున్నారు.

Amaravati: ఎన్నికల్లో ఘన విజయం సాధించామన్న విజయ గర్వం తెలుగుదేశం పార్టీ నేతల్లో ఏమాత్రం కనిపించటం లేదు. పార్టీ గెలుపు కోసం ఎంతో శ్రమించిన నేతలు సైతం ఇప్పుడు పార్టీలో జరుగుతున్న పరిణామాలపై బహిరంగంగానే విమర్శిస్తున్నారు. వాస్తవానికి ఎన్నికలకు రెండేళ్ల ముందు నుంచే అధినేత చంద్రబాబు పార్టీ గెలుపుపై ఫోకస్ పెట్టారు. పార్టీలో కిందిస్థాయి కార్యకర్తలతో కూడా మమేకం అయ్యారు.. జిల్లాల్లో పర్యటించారు. అలాగే వారంలో నాలుగు రోజులు తప్పనిసరిగా పార్టీ కేంద్ర కార్యాలయంలో నేతలు, కార్యకర్తలతో భేటీ అయ్యారు.  అయితే టీడీపీ జాతీయ ప్రధాన కార్యదర్శి, మంత్రి నారా లోకేష్ తీరు మాత్రం ఇందుకు పూర్తి విరుద్ధం. యువగళం పాదయాత్ర చేశారు. స్థానిక సమస్యలు తీరుస్తామంటూ హామీ ఇచ్చారు. అయితే మూడేళ్లుగా మంగళగిరి కేంద్ర కార్యాలయానికి రావడానికి మాత్రం చినబాబుకు సమయం లేకుండా పోయింది. పార్టీ నేతలంతా ప్రజలకు అందుబాటులో ఉండాలనేది అధినేత ఆదేశం. అందులో భాగంగానే పార్టీ కార్యాలయంలో గ్రీవెన్స్ సెల్ ఏర్పాటు చేశారు. ఓ మంత్రి, పార్టీ సీనియర్ నేతతో పాటు అనుబంధ సంఘాలకు చెందిన నేతలు కూడా ఉండాలన్నారు.  అలాగే ప్రతి శనివారం స్వయంగా పార్టీ కార్యాలయానికి వచ్చి స్వయంగా ఫిర్యాదులు స్వీకరిస్తున్నారు. అయితే మంత్రి నారా లోకేష్ మాత్రం పార్టీ కార్యాలయం వైపు రావటం లేదు. పైగా ఇంటి దగ్గర విడిగా ప్రజాదర్బార్ నిర్వహిస్తున్నారు. కిందిస్థాయి కార్యకర్త మొదలు జాతీయ స్థాయి నేత వరకు.. ఎవరైనా సరే లోకేష్ ను కలవాలంటే ఉండవల్లి క్యాంపు కార్యాలయానికి వెళ్లాల్సిందే. అంతే తప్ప మంగళగిరి ఆఫీస్ వైపు కన్నెత్తి కూడా చూడటంలేదు.  పార్టీ కార్యాలయాన్ని తెలుగు తమ్ముళ్లు దేవాలయంగా భావిస్తారు. అందుకే వైసీపీ మూకలు పార్టీ కార్యాలయంపై దాడి చేసిన తర్వాత ఆవేదనకు గురయ్యారు. దాడికి నిరసనగా చంద్రబాబు దీక్ష చేస్తున్న సమయంలో మేమంతా మీ వెంటే అంటూ తోచినంత సాయం కూడా చేశారు. ఎన్టీఆర్ భవన్ అంటే తెలుగుదేశం పార్టీ కార్యక్రమాలకు ఓ భరోసా. కానీ అలాంటి కేంద్ర కార్యాలయానికి పార్టీ జాతీయ ప్రధాన కార్యదర్శి రాకపోవడం పై నేతలు చర్చించుకుంటున్నారు. మరి ఈ అనుమానాలకు, పుకార్లకు చెక్ పెట్టాలంటే.. ఇకనుంచి చినబాబు పార్టీ ఆఫీసుకు రావాల్సిందే.

ప్రకాశం జిల్లా: జిల్లా లో మరో తెలుగు శాసనం వెలుగులోకి వచ్చింది. మిల్లంపల్లె వేణుగోపాలస్వామి ఆలయంలో 15వ శతాబ్దానికి చెందిన తెలుగుశాసనం బయటపడింది. 1440లో మిల్లంపల్లె గ్రామంలోని వేణుగోపాలస్వామి ఆలయంలో నిత్యాన్నదానం కోసం ఓ గ్రామాన్ని కానుకగా ఇచ్చినట్టు శాసనంలో రాసి ఉంది. శ్రీమన్‌ మహా మహామండలేశ్వర అనివారణ సింహారావు అనే పాలకుడు వరదరాజులుకు కొలుకులసీమలోని కూనెబోయినపల్లెని బహుమతిగా ఇచ్చి స్వామివారి ఆలయంలో నిత్యాన్నదానం చేయాలని సూచించినట్టు శాసనంలో గుర్తించారు. పురావస్తుశాఖ అధికారులు ఈ విషయాన్ని ధృవీకరించారు. శాలివాహనశకం 1440 వైశాఖ శుద్ద పంచమినాడు అఖిలాండకోటి బ్రహ్మాండనాయకుడైన మిల్లంపల్లె గోపినాధదేవరకు (ఇప్పటి వేణుగోపాలస్వామి) నిత్యాన్నదానం నిర్వహించేందుకు శ్రీపోతరాజు సింగరయ్య గారికుమారుడు వరదరాజులుగారి ఏలుబడిలో ఉన్న కొలుకుల సీమలోని కూనబోయినపల్లి అనేగ్రామాన్ని స్వామివారి నైవేద్యాలకు సమర్పించారు. అనివారణ సింహారావు బిరుదుకలిగిన ఈ రాజులు గుత్తి పాలకులుగా కూడా ఉన్నారు. ఇది ఇక్కడ లభించిన మొదటి శాసనంగా రికార్డు చేశారు. కొద్ది రోజుల క్రితం ప్రసిద్ధ పుణ్యక్షేత్రం శ్రీ త్రిపురాంతకేశ్వరస్వామి ఆలయంలో 14వ శతాబ్దం నాటి మరో శాసనం వెలుగు చూసింది. ఆలయ ప్రాంగణంలోని నంది పక్కనే ఉన్న ఓ స్తంభంపై ఈ శాసనం చెక్కి ఉన్నట్టు గుర్తించారు. అయ్యంగార్లకు భూములు, సంపదలు ఉన్నా భిక్షాటన చేయడం ద్వారా వచ్చిన ఆదాయంతో ఆలయాల పునరుద్ధరణ, నిర్వహణ చేసేవారు. అలా 14వ శతాబ్దంలో త్రిపురాంతకేశ్వరాలయం భిక్షవృత్తి అయ్యంగార్ల ఆధీనంలో ఉందన్న వివరాలను ఈ శాసనం తెలియచేస్తోంది. తాజాగా ఈ శాసనాన్ని చారిత్రక పరిశోధకులు తురిమెళ్ళ శ్రీనివాసప్రసాద్‌ గుర్తించి వెలుగులోకి తీసుకొచ్చారు. శ్రీశైలానికి తూర్పు ద్వారంగా విలసిల్లుతున్న త్రిపురాంతకం క్షేత్రం శైవ, శాక్తేయ ఆలయాల్లో అతి పురాతనమైంది. ఇక్కడ వేద విశ్వవిద్యాలయం నడిపినట్లు శాసనాల ద్వారా తెలుస్తోంది. త్రయంబకాయ- త్రిపురాంతకాయ.. త్రికాగ్నికాలాయ-కాలాగ్నిరుద్రాయ అంటూ ఈ ఆలయంలో నిత్యం రుద్రం వల్లె వేస్తుంటారు. శ్రీచక్ర ఆకారంలో శక్తి పీఠాల ఆలయాలను నిర్మిస్తుండటం ఆనవాయితీ కాగా త్రిపురాంతకేశ్వరుని ఆలయం శ్రీచక్ర పీఠంపై నిర్మితం కావడంతో ఈ ఆలయానికి ప్రత్యేక విశిష్టత సమకూరింది. ఈ ఆలయం శ్రీశైల ఆలయం కంటే అతి పురాతనమైందిగా చెబుతారు. 7వ శతాబ్ధంలోని కాకతీయుల కాలంలో నిర్మాణం జరిగిన అతి ప్రాచీన ఆలయం త్రిపురాంతక క్షేత్రంగా చెబుతారు. ఆలయానికి వేసిన రంగులను ఇటీవల తొలగించడంతో శిల్ప సంపదతో పాటు గోడలపై శాసనాలు వెలుగులోకి వస్తున్నాయి.

ఏపీలో వైసీపీ నేతల తీరు ఇప్పుడు విమర్శలకు తావిస్తోంది. ఐదేళ్ల పాటు అధికారంలో ఉన్న సమయంలో పార్టీ అధినేత, నాటి సీఎం జగన్‌పైన పొగడ్తల వర్షం కురిపించారు వైసీపీ నేతలు. ఇంటా బయటా, అసెంబ్లీలో, వెలుపలా, పార్టీ కార్యక్రమం,  అధికారిక కార్యక్రమం అనే తేడా లేకుండా జగన్‌పైన తమకున్న అభిమానాన్ని చాటుకున్నారు. కొందరు నేతలైతే జగన్ మెప్పు కోసం ప్రతిపక్ష నేతలను నోటికి వచ్చినట్లు బూతులు తిట్టారు కూడా. మాజీ స్పీకర్ తమ్మినేని సీతారాం, మాజీ డిప్యూటీ సీఎం ధర్మాన కృష్ణదాస్, మాజీ మంత్రులు, కొడాలి నాని, జోగి రమేష్, మాజీ ఎమ్మెల్యే ద్వారంపూడి చంద్రశేఖర్ రెడ్డి అయితే బహిరంగంగానే నోటీకి వచ్చిన బూతులతో రెచ్చిపోయారు. దీనిపై అప్పట్లో విమర్శలు వెల్లువెత్తినా కూడా ప్రభుత్వం తరఫు నుంచి ఎలాంటి ఖండనా రాలేదు. పైగా ఇలా తిట్టిన వారికే కీలకమైన పదవులిచ్చారు జగన్. ఇక కొందరు మహిళా నేతలైతే అసెంబ్లీ వేదికగానే జగన్ కీర్తనలు కూడా పాడారు. మాజీ ఉప ముఖ్యమంత్రి పుష్ప శ్రీ వాణి టిక్ టాక్ వీడియోలు చేయగా... మాజీ మంత్రి రోజా అయితే ఏకంగా దేవుడి గదిలోనే జగన్ ఫోటో అతికించారు. అయితే ఇదంతా గతం. ప్రస్తుత పరిస్థితి పూర్తిగా విరుద్ధంగా మారిపోయింది. గతంలో పదవులు అనుభవించిన నేతలెవరూ ఇప్పుడు కనీసం మాట్లాడటం లేదు. అప్పుడప్పుడు రోజా మాత్రం వీడియోలో వాయిస్ రిలీజ్ చేస్తున్నారు తప్ప... క్షేత్రస్థాయిలో ఎక్కడా కనిపించడం లేదు. ఇక పుష్ప శ్రీ వాణి అయితే ఎక్కడున్నారో తెలియదు. మాజీ హోమ్ మంత్రులిద్దరూ అడ్రస్ లేకుండా పోయారు. బుల్లెట్ దిగిందా లేదా.. అంటూ అసెంబ్లీ గొప్పగా మాట్లాడిన అనిల్... ఓడిపోతే రాజకీయాలకు గుడ్ బై చెబుతా అంటూ చేసిన సవాల్ మర్చిపోయి మళ్లీ నెల్లూరు వెళ్లిపోయారు. మాజీ ఎమ్మెల్యే బియ్యపు మధుసూధన్ రెడ్డి కనిపించడం లేదని శ్రీకాళహస్తిలో పోస్టర్లు కూడా వేశారు. ఇక మాజీ మంత్రులు కొట్టు సత్యనారాయణ, కారుమూరి నాగేశ్వర్రావు, ఉష శ్రీ చరణ్ అయితే పార్టీ మారేందుకు యత్నిస్తున్నారనే పుకార్లు షికారు చేస్తున్నాయి. చివరికి వైసీపీలో నెంబర్ టూ స్థానం కోసం తెగ ప్రయత్నం చేసిన మాజీ మంత్రి పెద్దిరెడ్డి రామచంద్రారెడ్డి సైతం ఇప్పుడు ఎక్కడా కనిపించటం లేదు. మదనపల్లె సబ్ కలెక్టర్ కార్యాలయంలో ఫైళ్ల దగ్ధం కేసు తర్వాత పెద్దిరెడ్డి పేరు ఎక్కడా వినిపించటం లేదు. చివరికి సొంత జిల్లాలోని తిరుమల లడ్డూ వివాదంపై కూడా పెద్దిరెడ్డి కనీసం స్పందించలేదు. దీంతో నాడు జగన్‌‌పై పొగడ్తల వర్షం కురిపించిన నేతలంతా ఇప్పుడు ఏమయ్యారనే ప్రశ్న తలెత్తుతోంది.

కూటమి ప్రభుత్వం అధికారంలోకి వచ్చి నాలుగు నెలలు కావొస్తోంది. ఐదేళ్ల వైసీపీ పాలన మరకలు ఇప్పటికీ చెరిగిపోలేదు. గాడి తప్పిన వ్యవస్థలను సరిదిద్దడంతో పాటు ఏపీని తిరిగి ప్రగతి పథంలో నిలుపుతారని చంద్రబాబుపైన రాష్ట్ర ప్రజలు గంపెడాశ పెట్టుకున్నారు. అయితే కూటమి ప్రభుత్వానికి నిధుల కొరత అతి పెద్ద అడ్డంకిగా మారిందనేది వాస్తవం. ఐదేళ్ల జగన్ పాలనలో దాదాపు రూ.8 లక్షల కోట్లు పైగా అప్పులు చేశారనేది కేంద్ర ప్రభుత్వ మాట. ఇక టీడీపీ, జనసేన, బీజేపీ నేతలు కూడా రాష్ట్రాన్ని జగన్ అప్పుల ఊబిలో దింపేశాడని తొలి నుంచి విమర్శలు చేస్తూనే ఉన్నారు. ఐదేళ్ల పాలనలో జగన్ కేవలం సంక్షేమ పథకాల అమలుపైనే ఫోకస్ పెట్టాడని... అభివృద్ధిని పూర్తిగా పక్కన పెట్టేశారనే విమర్శలు తొలి నుంచి వినిపిస్తున్నాయి. దీంతో రాష్ట్ర ఖజానా పూర్తిగా ఖాళీ అయ్యింది. చివరికి జీతాలకు కూడా అప్పులు చేయాల్సిన పరిస్థితి తలెత్తిందనేది వాస్తవం. ప్రతి శుక్రవారం ఇండెంట్ పెట్టడం... మంగళవారం అప్పు తెచ్చుకోవడం... దానిని పంచి పెట్టడం అనేది రొటిన్‌గా జరిగిపోయింది. జగన్ సర్కార్ వేధింపుల కారణంగా ఏపీకి పెట్టుబడులు కూడా రాలేదు. దీంతో ఆదాయం పూర్తిగా కుంటుపడిపోయింది.  జగన్ సర్కార్ లోపాలను ప్రధానంగా ఎత్తిచూపిన నాటి ప్రతిపక్ష నేత చంద్రబాబు రాష్ట్రాన్ని తిరిగి అభివృద్ధి పథంలో నిలిపే బాధ్యత నాది అని ఎన్నికల్లో భరోసా ఇవ్వడంతో... ఓటర్లు ఏకపక్షంగా ఓట్లు వేశారు. దీంతో వైసీపీకి కనీసం ప్రతిపక్ష హోదా కూడా దక్కలేదు. అయితే ఇక్కడే చంద్రబాబు సర్కార్‌కు అసలు సిసలు టాస్క్ మొదలైంది. ప్రధానంగా ఏపీలో రహదారుల మరమ్మతుల సమస్య ప్రభుత్వానికి పెను సవాల్‌గా మారింది. ప్రతిపక్షంలో ఉన్న సమయంలో జనసేన అధినేత, ఉప ముఖ్యమంత్రి పవన్ కల్యాణ్ ఏపీలో రహదారుల దుస్థితిపై ప్రత్యక్ష పోరాటాలు చేశారు. గుంతలమయమైన రోడ్ల గురించి సోషల్ మీడియా వేదికగా ప్రభుత్వాన్ని ప్రశ్నించారు. తూర్పుగోదావరి, అనంతపురం జిల్లాల్లో రోడ్లపై నాట్లు వేసి నిరసన తెలిపారు. చివరికి మీడియాలో కూడా రోడ్ల దుస్థితిపై ఎన్నో కథనాలు వెలువడ్డాయి. అధికారంలోకి వచ్చిన వెంటనే అన్ని రహదారులను మరమ్మతు చేస్తామని చంద్రబాబు హామీ ఇచ్చారు. అయితే ఇప్పుడు హామీ నెరవేర్చడం కూటమి ప్రభుత్వానికి పెద్ద సవాల్‌గా మారింది. ఖజానాలో చిల్లిగవ్వ లేదని ఓ వైపు సీఎం చంద్రబాబు స్వయంగా చెబుతున్నారు. అలాగే సంక్షేమ పథకాల అమలుపైనే ప్రధానంగా దృష్టి పెట్టారు. ఈ సమయంలో రోడ్ల మరమ్మతుకు కనీసం 10 వేల కోట్లు కావాలని అధికారులు ప్రాధమిక అంచనా వేశారు. చాలా చోట్ల అత్యంత దయనీయంగా రోడ్లు మారిపోయాయి. వీటిని తక్షణమే మరమ్మతు చేయాల్సిన అవసరం ఉందని స్థానిక ప్రజాప్రతినిధులు ముఖ్యమంత్రిని వేడుకుంటున్నారు. అయితే వీటికి నిధులను ఎలా సేకరించాలనే అంశంపై అధికారులతో చంద్రబాబు సమీక్ష నిర్వహిస్తున్నారు. వర్షాకాలం ముగియడంతో... జూన్ నెల లోపు రహదారులను మరమ్మతు చేయాలనేది లక్ష్యంగా కూటమి సర్కార్ ప్లాన్ చేస్తోంది.