మార్కాపురం: పట్టణ ఇలవేల్పు శ్రీ లక్ష్మీ చెన్నకేశవ స్వామి వారి రథసప్తమి వేడుకలు ఫిబ్రవరి 4వ తేదీన అంగరంగ వైభవంగా నిర్వహించనున్నారు. ఈ సందర్భంగా బుధవారం ఉదయం ఆలయ ప్రాంగణంలో ఎమ్మెల్యే కందుల నారాయణరెడ్డి, ఉత్సవ కమిటీ చైర్మన్ యక్కలి కాశీ విశ్వనాథంతో కలిసి రథసప్తమి ఉత్సవాల గోడ పత్రికను ఆవిష్కరించారు. ఈ సందర్భంగా నారాయణరెడ్డి మాట్లాడుతూ రథసప్తమి ఉత్సవం మార్కాపురంలో అత్యద్భుతంగా నిర్వహించేందుకు ఉత్సవ కమిటీ అన్ని చర్యలు తీసుకోవాలని సూచించారు. మార్కాపురం ప్రాంత ప్రజానీకమే కాక సుదూర ప్రాంతాల నుంచి బంధువులు కూడా ఉత్సవాల్లో పాల్గొంటారని ఈ సందర్భంగా నిర్వాహకులు తెలిపారు. కార్యక్రమంలో కమిటీ ప్రతినిధులు వక్కలగడ్డ మల్లికార్జున,ఆలంపల్లి శ్రీనివాసులు, టీడీపీ నాయకులు తాళ్ళపల్లి సత్యనారాయణ, మొద్దు వెంకటరెడ్డి, మట్టం వెంకటేశ్వర్లు,బొంతల సుధీర్,ఈఓ గొలమారు శ్రీనివాసరెడ్డి, ప్రధాన అర్చకులు శ్రీపతి అప్పనాచార్యులు తదితరులు పాల్గొన్నారు.

అగ్ని న్యూస్,మార్కాపురం : మండలంలోని బోడపాడు గ్రామంలో మంగళవారం రాష్ట్ర ప్రభుత్వం ప్రతిష్టాత్మకంగా చేపట్టిన పశువైద్య శిబిరాన్ని మండల టిడిపి యూత్ అధ్యక్షులు బొగ్గు శేఖర్ రెడ్డి  ఆధ్వర్యంలో నిర్వహించారు. ఈ కార్యక్రమానికి ముఖ్యఅతిథిగా మార్కాపురం పశు వైద్యశాల అసిస్టెంట్ డైరెక్టర్ బి.చిన్న బాలు నాయక్ పాల్గొన్నారు. ఈ సందర్భంగా బాలు నాయక్ మాట్లాడుతూ గొర్రెలకు, మేకలకు, దూడలకి,నట్టల నివారణ, గేదెలకు, గర్భకోశ వ్యాధులకు సంబంధిత వ్యాధులకు మందులను రైతులకు పంపిణీ చేశారు.ఈ కార్యక్రమంలో గజ్జలకొండ పశువైద్యాధికారి వి. అశోక్ కుమార్, ఇడుపూరు గ్రామీణ పశు వైద్యశాల  జూనియర్ వెటర్నరీ ఆఫీసర్ పి.అనిత, యానిమల్ హస్బెండరి అసిస్టెంట్లు సాయితేజ, తేజస్విని , అటెండర్ కోటిరెడ్డి లు పాల్గొన్నారు.

     ఉన్నతాధికారుల పర్యవేక్షణ సరిగా లేకపోవడంతో సచివాలయ ఉద్యోగులు ఇష్టారీతిగా వ్యవహరిస్తున్నారు. సమయపాలన పాటించకుండా మొక్కుబడిగా ఉద్యోగాలు వెలగబెడుతున్నారు. దీంతో చిన్న చిన్న పనులకు సచివాలయం కు వెళ్లే ప్రజలకు నిరాశ ఎదురవుతుంది. ఖాళీ కుర్చీలు దర్శనమిస్తున్నాయని జనం వాపోతున్నారు.  ఈ పి ఓ ఆర్ డి తనిఖీలు చేయగా మండలంలోని నాగెళ్ళ ముడుపు సచివాలయం బోసిపోతు కనిపించింది. ఉద్యోగులు సకాలంలో కార్యాలయానికి రాకపోవడం పట్ల ఆయన ఆగ్రహం వ్యక్తం చేశారు. విధులు సరిగా నిర్వహించకపోతే క్రమశిక్షణ చర్యలు తీసుకుంటామని హెచ్చరించారు.  

మార్కాపురం :  నెహ్రూ యువ కేంద్రం మరియు దీక్ష యువజన స్వచ్ఛంద సంస్థ సంయుక్తంగా బుధవారం బ్లాక్ లెవెల్ క్రీడా పోటీలను  నిర్వహిస్తున్నట్లు బ్లాక్ ప్రతినిది, సంస్థ అధ్యక్షులు శ్రీధర సాయి సుబ్బారావు తెలిపారు. ఈ సందర్భంగా పట్టణంలోని జిల్లా పరిషత్ బాలుర పాఠశాలలో వాలీబాల్, కబడ్డీ, స్లో సైక్లింగ్, రన్నింగ్ వంటి క్రీడలను నిర్వహిస్తున్నట్లు ఆయన తెలిపారు. గెలుపొందిన  విజేతలకు  స్పోర్ట్స్ కిట్, సర్టిఫికెట్స్, మెడల్ లు అందచేస్తామన్నారు.

వెలిగండ్ల (ప్రకాశం జిల్లా): రోడ్డు నిబంధనలు పాటించకుండా ఇష్టారాజ్యంగా వాహనాలు నడిపితే కేసులు నమోదు చేస్తామని వెలిగండ్ల ఎస్సై మధుసూదన్ రావు వాహనదారులను హెచ్చరించారు. మంగళవారం  ట్రాక్టర్ డ్రైవర్లు, యజమానులకు ఆయన కౌన్సిలింగ్ ఇచ్చారు. వాహనం నడిపేటప్పుడు సెల్‌ఫోన్ వాడడం, పెద్ద శబ్దంతో పాటలు ప్లే చేస్తే ఉపేక్షించేది లేదన్నారు. డ్రైవర్లు లైసెన్సులు కలిగి ఉండడంతోపాటు, వాహన రికార్డులు కలిగి ఉండాలన్నారు.

మార్కాపురం: దోర్నాల మండలం తుమ్మల బైలుకు చెందిన గిరిజన మహిళలకి, అధికారులు అంగన్వాడి ఇంటర్వ్యూ కి రమ్మని లెటర్ పంపారు. తీరా ఇంటర్వ్యూ కోసం మార్కాపురం సబ్ కలెక్టర్ కార్యాలయానికి ఇంటర్వ్యూ కోసం వచ్చిన గిరిజన మహిళలకు, ఇంటర్వ్యూలో మీ పేరు లేదని అధికారులు చెప్పడంతో  గిరిజన మహిళలు నివ్వెరపోయారు. లెటర్లు పంపి ఇప్పుడు ఇంటర్వ్యూలో మా పేరు లేదని చెప్పడం ఏమిటని గిరిజన మహిళలు ఆందోళన చేపట్టారు.

కొమరోలు : గిద్దలూరు లోని  ప్రభుత్వ వైద్యశాలలో 29 వ తేదీ బుధవారం కొమరోలు మండలంలోని వికలాంగులకు, వికలాంగుల సంక్షేమ శాఖ ఆధ్వర్యంలో మెడికల్ క్యాంపు నిర్వహిస్తున్నట్లుగా ఎంపీడీవో మస్తాన్ వలి తెలిపారు. వైద్య పరీక్షల అనంతరం వికలాంగులకు అవసరమైన పనిమూట్లను ఉచితంగా అందజేస్తారని తెలిపారు. కొమరోలు మండలంలోని వికలాంగులు ఈ విషయాన్ని గమనించి గిద్దలూరులోని ప్రభుత్వ వైద్యశాలకు ఉదయం 10 గంటలకు వెళ్లాలని సూచించారు.

ఆంధ్రప్రదేశ్ రాష్ట్ర ప్రభుత్వ ఆదేశాల మేరకు ఆంధ్రప్రదేశ్ స్టేట్ స్కిల్ డెవలప్‌మెంట్ కార్పొరేషన్ ప్రతి నియోజకవర్గానికి స్కిల్ హబ్‌లను ఏర్పాటు చేస్తుంది. ఇందులో భాగంగా మార్కాపురం పట్టణం లోని సెరీకల్చర్ కార్యాలయం దగ్గరలోని  జాతీయ నిర్మాణ సంస్థ (నేషనల్ అకాడమీ ఆఫ్ కన్‌స్ట్రక్షన్ ) న్యాక్ ట్రైనింగ్ సెంటరు నందు  ఆంధ్రప్రదేశ్ రాష్ట్ర నైపుణ్య అభివృద్ధి సంస్థ వారిచే కోర్సు:-1 అసిస్టెంట్ ఎలక్ట్రీషియన్ 2.అసిస్టెంట్ పృంబర్  జనరల్ పై   90 రోజుల పాటు ఉచిత ట్రైనింగ్ ప్రోగ్రాం నిర్వహించడం జరుగుతుంది. ప్లేస్‌మెంట్ దృవీకరణ పత్రం కూడా ఇవ్వబడును. విద్యార్హత :- 10th,ITI,Inter,Degree పురుషులకు మాత్రమే. ఆసక్తిగల అభ్యర్థులు  విద్యార్హత సర్టిఫికేట్లు , ఆధార్ కార్డ్ మరియు పాస్ ఫొటో తో తర్లుపాడు రోడ్డు లోని సాయి బాలాజీ స్కూల్ ఎదురు గా ఉన్న నాక్ ట్రైనింగ్ సెంటర్ లో సంప్రదించగలరు. మరిన్ని వివరాలకు ఈ క్రింది నెంబర్లను సంప్రదించగలరు. షేక్ సుల్తాన్ బాషా:  9491701128, పి.రజనీకాంత్:  8099424471, షేక్ ఫిరోజ్: 7013950097.

పెద్దారవీడు : మండలంలోని గొబ్బూరు, దేవరాజు గట్టు మధ్యలో గల జాతీయ రహదారిపై సబ్ ఇన్స్పెక్టర్ అనిల్ కుమార్ తన సిబ్బందితో కలిసి హెల్మెట్ ధరించని వాహన చోదకులకు భద్రతపై అవగాహన కల్పిస్తూ మంగళవారం చలానాలు విధించారు. ప్రాణం ఎంతో విలువైనదని ద్విచక్ర వాహనదారులు తప్పనిసరిగా హెల్మెట్ ధరించే రోడ్లపై ప్రయాణించాలని, అదేవిధంగా కారులో ప్రయాణించే వారు సీట్ బెల్టు పెట్టుకొని ప్రయాణించాలని కోరారు. దగ్గరే కదా అనుకొని హెల్మెట్ లేకుండా ప్రయాణం చేస్తే మృత్యువు మీ వెనకే ఉండవచ్చు అనే విషయాన్ని గమనించాలని తెలిపారు.

ఒంగోలు : విధుల నిర్వహణలో నిర్లక్ష్యాన్ని సహించబోనని జిల్లా కలెక్టరు ఏ. తమీమ్ అన్సారియా హెచ్చరించారు. సోమవారం జాయింట్ కలెక్టరు ఆర్.గోపాలకృష్ణతో కలిసి ప్రకాశం భవనం నుంచి మండల స్థాయి అధికారులతో ఆమె వీడియో కాన్ఫరెన్సు నిర్వహించారు. వివిధ కేటగిరీలలో సచివాలయాల ద్వారా అందించాల్సిన సేవలు పేలవంగా ఉండడం, ఎంపీడీవో ల పర్యవేక్షణ సరిగా లేకపోవడంపై ఆమె ఆగ్రహం వ్యక్తం చేసారు. సింగరాయకొండ, ఎర్రగొండపాలెం ఎంపీడీఓ లకి షోకాజు నోటీసులు జారి చేయాలనీ జడ్పీ సీఈఓ కు చెప్పారు. స్కూల్ టాయిలెట్ల తనిఖీ, బయోమెట్రిక్ హాజరు, ఏపీ సేవా సర్వీసుల పేమెంట్ డబ్బులు సకాలంలో జమ చేయడం, హౌస్ జియో కో-ఆర్డినేట్స్, ఎన్.పి.సి.ఐ. నమోదు విషయంలో సచివాలయ సిబ్బంది నిర్లక్ష్యం వహిస్తే సాహించబోనని ఆమె స్పష్టం చేసారు. పలుమార్లు చెప్పినా ఈ విషయాలలో పురోగతి కోసం ఎందుకు ప్రత్యేకంగా దృష్టి సారించడం లేదని ఎంపీడీఓ లపై ఆగ్రహం వ్యక్తం చేసారు. 6 ఏళ్ల లోపు చిన్నారులకు ఆధార్ కార్డుల నమోదు కోసం ఏర్పాటు చేస్తున్న శిబిరాలను సద్వినియోగం చేసుకునేలా ప్రజలకు అవగాహన కల్పించాలన్నారు. అగన్వాడీ కేంద్రాలలో తాగు, టాయిలెట్లకు నీటి వసతి సత్వరమే కల్పించాలని ఆర్డబ్ల్యుఎస్ అధికారులను ఆదేశించారు. గ్రామ పంచాయతీ లలో పారిశుధ్యంతో పాటు మంచి నీటి కుళాయి కనెక్షన్లు, ఇంటి పన్నులపై దృష్టి పెట్టాలని చెప్పారు. ఉపాధి హామీ పధకంలో లక్ష్యం మేరకు పని దినాలు కల్పించి లేబర్ బడ్జెట్ ను వినియోగించుకునేలా ఎప్పటికప్పుడు చర్యలు తీసుకోవాలని కలెక్టరు దిశా నిర్దేశము చేశారు. ఫిబ్రవరి ఒకటో తేదిన సామూహిక గృహ ప్రవేశాలు ఉన్నందున పెండింగ్ పనులను త్వరగా పూర్తి చేయాలని అధికారులను ఆమె ఆదేశించారు. ఈ వీడియో కాన్ఫరెన్సులో హౌసింగ్ పీడీ పి. శ్రీనివాస ప్రసాద్, డీపీవో వెంకట నాయుడు, డ్వామా మా పీడీ జోసఫ్ కుమార్, జడ్పీ సీఈఓ చిరంజీవి, సీపీవో వెంకటేశ్వర్లు, పరిశ్రమల జనరల్ మేనేజర్ శ్రీనివాసరావు, ఇతర అధికారులు పాల్గొన్నారు.

ప్రకాశం జిల్లా పొదిలి మండలం సల్లూరు గ్రామంలో గురువారం రోజున గ్రామంలో అంత్యక్రియలను అడ్డుకున్న ఘటనపై దోర్నాలలో ఆంధ్రప్రదేశ్ రాష్ట్ర  ఉద్య యాదవ సంఘం అధ్యక్షులు గుమ్మా యల్లేష్ యాదవ్ తీవ్రంగా ఖండించారు. ఈ మేరకు ఆయన ఆదివారం మీడియాతో మాట్లాడారు. వెంకటేశ్వర్లు యాదవ్ చనిపోతే, ఆయన అంత్యక్రియలను సల్లూరు గ్రామస్తులు అడ్డుకోవడం చాలా హీనమైన చర్య అని అన్నారు. ఈఘటనను ఖండిస్తున్నామని అన్నారు..పొదిలి సీఐ,ఎస్సై తహసీల్దార్ ల అత్యుత్సాహం వల్ల ఇంత జరిగింది అన్నారు.ఈ ఘటనను దేశవ్యాప్తంగా తీసుకెళ్తామని హెచ్చరించారు. రేపు ఖర్మ కార్యక్రమాన్ని ఎవరైనా అడ్డుకుంటే సీఐ దే బాధ్యత అని  అన్నారు. యాదవులు అంటే సద్ది కట్టుకొని పోతుంటే ఎవ్వరైనా ఆకలితో ఉంటే వారికి ఆ సద్ది ఇచ్చి కడుపు నింపే జాతి అని, శ్రీకృష్ణుడు పుట్టిన జాతి అని అన్నారు.. చనిపోయిన వ్యక్తి వంశస్తులే అక్కడ ఉన్న స్మశానానికి స్థలం ఇస్తే, అదే స్థలంలో అతని అంత్యక్రియలు చేస్తే అడ్డుకుంటారా దీనికి సమాధానం చెప్పాలి అన్నారు.. ఈ ఘటనలో అత్యుత్సాహం ప్రదర్శించిన పొదిలి సీఐ ని డిస్మిస్ చేయాలని,ఎస్సై తహసీల్దార్ పై చర్యలు తీసుకోవాలని అన్నారు. యాదవులకు జరిగిన ఘటనపై బహుజనవాదంగా బిసి ఎస్టీ,ఎస్సి లు ఆలోచించాలని అన్నారు..యాదవులు అంటే ఒక ఊరిలో ఉన్నవాళ్లు కాదు రాష్ట్రం, దేశం మొత్తంలో ఉన్నారని,అవసరం అయితే అఖిలేష్ యాదవ్ దగ్గరకు వెళ్లి కొట్లాడతాం, ఈ సమస్యను ఇంతటితో వదిలి పెట్టము అని అన్నారు. ఈరోజు మాకు జరిగిన సమస్య రేపు మిగితా కులాలకు జరగదని గ్యారెంటీ ఏంటి అని అన్నారు..రేపు జరగబోయే  దశదిన ఖర్మ క్రియ కార్యక్రమాన్ని ఎవరు అయిన అడ్డుకుంటే యాదవులు, యాదవ సంఘాలతో కలిసి పోలీసు స్టేషన్,తహశీల్దార్ కార్యాలయాన్ని ముట్టడిస్తామని హెచ్చరించారు.

ఒంగోలు: మార్కాపురం నియోజకవర్గ బిజెపి ఇన్చార్జి పివి కృష్ణారావుకు ఉత్తమ సామాజిక సేవకు గానూ ప్రశంసా పత్రం లభించింది. కృష్ణారావు సేవలను గుర్తించిన ప్రభుత్వం, గణతంత్ర దినోత్సవం సందర్భంగా ప్రశంసా పత్రాన్ని అందజేసింది. జిల్లా కలెక్టర్ తమీమ్ అన్సారియా, ఎస్పీ దామోదర్ ల చేతుల మీదుగా కృష్ణారావు ఈ ప్రశంసా పత్రాన్ని అందుకున్నారు. ఈ సందర్భంగా కృష్ణారావు మాట్లాడుతూ మార్కాపురం ప్రాంతంలో తాను చేసిన సేవలను గుర్తించి, తనను ప్రశంసా పత్రంతో అభినందించిన జిల్లా అధికారులకు, ప్రభుత్వానికి కృతజ్ఞతలు తెలిపారు. భవిష్యత్తులో మరింత సమయం కేటాయించి ప్రజలకు సేవ చేసేందుకు ముందు ఉంటానని ఈ సందర్భంగా ఆయన తెలిపారు.కాగా బీజేపీ నాయకులు కృష్ణారావు కు ఉత్తమ సేవా ప్రశంశా పత్రం రావడం పట్ల ఆయన మిత్రులు, పార్టీ నాయకులు, కార్యకర్తలు శుభాకాంక్షలు తెలిపారు.