విజయవాడ : పిల్లల మానసిక, శారీరక వికాసానికి బాల సాహిత్యం చక్కగా ఉపయోగపడుతుందని, రచయితలు ఆ రకమైన సాహిత్యానికి కృషి చేయడం ద్వారా బాలల్లో తెలుగు భాష పట్ల అభిమానం , అనురక్తి కలగ చేయాలని డిఆర్డీఓ చైర్మన్ సతీష్ రెడ్డి అభిలషించారు. కాకరపర్తి భావ నారాయణ కాలేజీ , విజయవాడలో జరుగుతున్న 6 వ ప్రపంచ తెలుగు మహాసభలు కార్యక్రమంలో ఆయన ముఖ్య అతిథిగా హాజరయ్యారు. బాలుర ఉన్నత పాఠశాల , మార్కాపురం గణిత ఉపాధ్యాయులు కాళంరాజు వేణుగోపాల్ రచించిన బొండు మల్లెలు బాలగేయాలు పుస్తకావిష్కరణ సందర్బంగా ఆయనతో పాటు తెలుగు భాషా సంఘం మాజీ అధ్యక్షులు, ప్రపంచ తెలుగు రచయితల మహాసభలు గౌరవాధ్యక్షులు మండలి బుద్ధ ప్రసాద్ పాల్గొని రచయితలను అభినందించారు.
బాల సాహిత్యం జీవితాలను మరియు ప్రపంచాలను విమర్శనాత్మకంగా పునర్నిర్మించడానికి ఒక మాధ్యమంగా మరియు ఎంతో విలువైనదిగా పరిగణించబడుతుందని పేర్కొన్నారు. ఇది విభిన్న సంస్కృతులు మరియు సంప్రదాయాలలో విస్తృతమైన రూపాలు మరియు అంశాలను కలిగి ఉంటుందని,పిల్లలలో బాషా పట్ల ఆసక్తి, చదువు పట్ల ఆకర్షణ ఏర్పడేటట్లు చేయడంలో బాల గేయాలు ఎంతో ప్రముఖ పాత్ర పోషిస్తాయనడంలో ఎటువంటి అతిశయోక్తి లేదని చెప్పవచ్చు అని వారు పేర్కొన్నారు. దురదృష్టం ఏమిటంటే రోజు రోజుకీ ఉనికి కోల్పోతున్న తెలుగు భాష దయనీయ పరిస్థితికి ఒకరకంగా ప్రభుత్వం, ఇంకొరకంగా తల్లిదండ్రులు కారణం అని, ఇటువంటి పరిస్థితులలో ఎన్నో కష్టనష్టాలకోర్చి రచయితలు చక్కటి పుస్తకాలను మన ముందుకు తెస్తున్నారని, వారిని ప్రోత్సహించాల్సిన అవసరం ప్రభుత్వానికి ఎంతైనా ఉందని ఆ దిశగా ఇప్పటికైనా అడుగులు పడతాయని ఆశిస్తున్నామని, చక్కటి బాలగేయాల పుస్తకం అందుబాటులోకి తెస్తున్న రచయిత వేణుగోపాల్ ని మనస్ఫూర్తిగా అభినందిస్తున్నానని ప్రపంచ తెలుగు రచయితల మహాసభలు కార్యనిర్వాహక అధ్యక్షులు మాజీ రాజ్యసభ సభ్యులు యార్లగడ్డ లక్ష్మీ ప్రసాద్ అభిలషించారు.
ఆధునిక విజ్ఞాన విషయాలను, సైన్స్ పదాలను అతి సరళంగా, ఆసక్తికరంగా రాయడం వల్ల పిల్లలకు అవి మరింత చేరువ అవుతాయి. అర్థం కాని మాటలు, జనావాసాలలో లేని పదాల కంటే తేలిక పదాలతో వ్రాసిన బాల సాహిత్యం ఖచ్చితంగా చదువరుల మెప్పు పొందుతుందని, కాళంరాజు వేణుగోపాల్ రచించిన బొండు మల్లెలు ఆ కోవలోకే వస్తుందని ఆశిస్తున్నానని కార్యక్రమానికి ముఖ్య అతిధిగా హాజరయిన డీ ఆర్ డీ ఓ చైర్మన్ సతీష్ రెడ్డి పేర్కొన్నారు. బాలల కోసం తయారు చేసిన పుస్తకాన్ని తయారు చేసిన రచయిత వేణుగోపాల్ ని ప్రత్యేకంగా అభినందించారు...
ఈ కార్యక్రమంలో రాష్ట్ర కాంగ్రెస్ నేత తులసీ రెడ్డి, సినీ పాటల రచయిత భువన చంద్ర, తెలంగాణ సాంస్కృతిక కమిటీ అధ్యక్షులు, జానపద గేయ రచయిత గోరటి వెంకన్న, విశ్రాంత హైకోర్ట్ న్యాయమూర్తి దుర్గా ప్రసాద్, రెండు తెలుగు రాష్ట్రాల నుండి మరియు కర్ణాటక,తమిళనాడు నుండి రెండు వేలకు మందికి పైగా కవులు, రచయితలు, తెలుగు బాషాభిమానులు పాల్గొన్నారు.
చక్కటి వేదికపై తన బాల గేయాల పుస్తకం బొండు మల్లెలు ఆవిష్కరించడం శుభ పరిణామమని బాలుర ఉన్నత పాఠశాల ప్రధానోపాధ్యాయులు మునగాల చంద్ర శేఖర్ రెడ్డి , సాధన డిగ్రీ కాలేజీ ప్రాచార్యులు డాక్టర్ కప్పగంతుల మధుసూదన్ శాస్త్రి, జాతీయ ఉత్తమ ఉపాధ్యాయ అవార్డు గ్రహీత తంగిరాల నాగ జగన్నాద్,మరియు బాలుర ఉన్నత పాఠశాల ఉపాధ్యాయులు సంతోషం వ్యక్తం చేసి రచయిత వేణుగోపాల్ ని అభినందించారు..
DRDO చైర్మన్ సతీష్ రెడ్డి, ఆ కాసేపట్లోనే ఒకసారి అలా పుస్తకం తిరగేసి ప్రత్యేకంగా రచయితను దగ్గరకు పిలిపించుకుని ఏం చేస్తుంటారు మీరు అని అడగడం, గణిత ఉపాధ్యాయుడని చెబితే ఆశ్చర్యపోయి, ప్రత్యేకంగా అభినందించడం మర్చిపోలేని అనుభవం అని పుస్తక రచయిత కాళంరాజు వేణుగోపాల్ అన్నారు.
