అర్చకుని పై దాడి అమానుషం

వేంపల్లె : సమాజ హితమే ధ్యేయంగా, సనాతన ధర్మమే ఊపిరిగా పనిచేస్తున్న అర్చకులపై దాడి చేయడం అమానుషమని అఖిల భారతీయ బ్రాహ్మణ సంఘం రాష్ట్ర అధ్యక్షులు ఇంద్రకంటి ప్రసాద్ శర్మ సిద్ధాంతి అన్నారు. వేంపల్లెలోని శ్రీ వాసవి కళ్యాణ మండపంలో హిందూ సంఘాలతో కలిసి మూతులకు నల్ల రిబ్బన్లు ధరించి నిరసన వ్యక్తం చేశారు. అనంతరం ఆయన మాట్లాడుతూ తెలంగాణ రాష్ట్రంలో ఉన్న ప్రముఖ పుణ్యక్షేత్రం చిలుకూరి బాలాజీ ఆలయ ప్రధాన అర్చకులు రంగరాజన్ పై దాడిని ప్రతి ఒక్కరు ఖండించాలన్నారు. ఈ దేశంలో సనాతన ధర్మాన్ని కాపాడడమే ధ్యేయంగా పని చేస్తూ, మన సంస్కృతి సంప్రదాయాలను సమాజంలోనికి తీసుకు వెళ్తున్న అర్చకులను అసభ్య పదజాలంతో దూషించి, దాడి చేసిన రామరాజ్యం వ్యవస్థాపకులు వీర రాఘవరెడ్డిపై చట్టపరమైన చర్యలు తీసుకొని అతనిని అరెస్టు చేయాలని అన్నారు.
సనాతన హిందూ ధర్మం నిలబడాలంటే  బ్రాహ్మిన్ అట్రాసిటీ చట్టం తీసుకురావాలని కేంద్ర, రాష్ట్ర ప్రభుత్వాలను డిమాండ్ చేశారు. సమాజంలో ఇటువంటి ఘటనలు జరుగుతున్నప్పుడు అక్కడున్నటువంటి ప్రభుత్వాలు పట్టించుకోకపోవడం దారుణమన్నారు. ఇలాగే చూస్తూ ఉంటే మన సంస్కృతి మీద ధర్మం మీద దాడి జరిగే ప్రమాదం ఉందని ఆయన అన్నారు. ఇటువంటి సంఘటనలను యావత్తు హిందువులు ఖండించాల్సిన అవసరం ఉందన్నారు. ఆంధ్రప్రదేశ్ లో హిందువులను ఏకం చేస్తూ నిర్వహించిన హైందవ శంఖారావం విజయవంతమైనప్పటికీ ఇలాంటి ఘటనలు జరగడం చాలా బాధాకరమని అన్నారు. ఈ కార్యక్రమంలో అర్చకులు ప్రసాద్ శర్మ, మురళి, భాజపా జిల్లా ప్రధాన కార్యదర్శి గాలి హరిప్రసాద్, జిల్లా ఉపాధ్యక్షురాలు సుస్మా, బీజేపీ నాయకులు దొంతు సుమన్, రంగారెడ్డి, కుమార్, సునీల్ కుమార్, ఈశ్వర్ రెడ్డి, చరణ్, సురేష్ శివ, విశ్వ హిందూ పరిషత్ సభ్యులు అంజన్ కుమార్, సుబ్బారావు, చందు, వినోద్, మహేష్ గంగిరెడ్డి సుబ్బారావు, ప్రసాద్ తదితరులు పాల్గొన్నారు.